په منځنۍ اسيا كې لويه لوبه
| په منځنۍ آسيا کې لويه لوبه.jpg | |
| ليکوال | بېلابېل |
|---|---|
| ژباړن | محمد طاهر کاڼی |
| د پښتۍ طراح | د دانش خپرندويه ټولنه |
| هېواد | پاکستان، پېښور |
| ژبه | پښتو |
| سکالو(موضوع) | تاريخي اثر |
| سبک(سبکونه) | تاريخي اثر |
| خپرندوی | د دانش خپرندويه ټولنه |
| د خپرېدو نېټه | |
په منځنۍ اسيا كې لويه لوبه ، هند ته د روسي پوځ لښکرکشي د روسۍ ختيځپوه تاتيانا نيکولايونا زاگارودنيکووا له خوا راټول شوی او اوډل شوی تاریخي اثر دی.
د کتاب د منځپانگې په اړه
د روسيې ختيځپوه او تاريخپوه ت . ن . زاگارودنيکووا دا تاریخي اثر چې د پښتو تکړه ليکوال او برلاسي ژباړن محمد طاهر کاڼي په خوږه او روانه پښتو ژباړلی ، د منځنۍ آسيا او افغانستان له لارې برتانوي هند ته د روسي لښکرکشۍ يوه رڼه هنداره ده . دا اثر منځنۍ اسيا او جنوب لويديځې اسیا ته د ولسونو د سیاسي برخليک د مينه والو لپاره يو په زړه پورې اثر دی . د افغانانو لپاره یې ځکه لوستل تر نورو لوستوالو زيات ارزښتناک دي چې موږ د تېر او لرغوني تاريخ په بهير کې له همیشه راهيسې د همدغې پوځي او سياسي ژرندې په پلونو کې دل شوی ولس يو. د دې کتاب په روسي چاپ کې د روسیې له دولتي پوځي تاريخي ارشيف ، د روسیې له تاریخی موزيم ، او د هند له ملي ارشيف څخه ۱۵۶ لاسونده راټول شوي ، چې ژباړونکی یې له پېنځو لاسوندنو پرته نور ټول پښتو ته راژباړلي دي . دغه لاسوندونه تر دې وروستيو وختونو پورې پټ ول او د اغلې اوډونکې په قول يوازې د شلمې پېړۍ په نوي یمو کلونو کې ترې د «بېخي پټ» ټاپه لري کړای شوه .
د چاپ چارې
په منځنۍ اسیا کې لويه لوبه اثر په جرمني کې د افغانستان د کولتوري ودې ټولنې له خوا د زرو ټوکو په شمېر خپور شوی دی . د چاپ چارې یې پر۱۳۸۵ لمريز (۲۰۰۶ ) ز کال په پېښور کې د دانش خپرندويي ټولنې تخنيکي څانگې له خوا ترسره شوې دي . کتاب په سپين ښه کاغذ کې چاپ شوی چې ټول ۳۸۹ مخونه لري . دغه اثر په پای کې د انځورونو برخه هم لري چې ۱۶ انځورونه پکې راټول شوي دي . د کتاب کمپوز پخپله ژباړن کړی او د ډيزاين کار یې هم حاجي محمد عمرخېل ترسره کړی دی .
اخځونه
- په منځنۍ اسیا کې لويه لوبه ، هند ته د روسي پوځ لښکرکشي .