فرشته غنی

فرشته غني

فرشته غني د غلام حیدر لور چې په ۱۳۷۵لمریز کال کې د کونړ ولایت اسمارو ولسوالۍ د سیوري کلی کې زیږیدلې ده. په ۱۳۹۲ لمریز کال کې د قلعه کاشف لیسې څخه له دولسم ټولګي فارغه شوه او په خپلو لوړو زده کړو په یوه خصوصي پوهنتون کې د حقوق او سیاسي علومو په برخه کې بوخته ده.

فعالیتونه

فرشته غني د پښتو ژبې تکړه شاعره لیکواله او ژورنالیسته ده چې په شعر ویلو او لیکلو یې د ښوونځی په نهم ټولګي کې پیل وکړ، د شاعری احساس ورسره په اووم ټولګي کې ملګرۍ شو او تر ننه یې د ژوندانه په دې سفر کې ورسره ملتیا کوي، چې ډیری شعرونه یې په مجلو، کتابونو، او ځینو ورځپاڼو کې چاپ شوي دي. فرشته د شاعرۍ تر څنګ د ژوند او ټولنې د ناخوالو په اړه هم لیکنې کوي، او د لنډو کیسو په لیکلو کې هم لاس برې ده، هغې لومړنۍ لنډه کیسه د وینې په نامه له ډیوې سره مزل کتاب کې چاپ او خپره شوې ده.

د پښتون لور یم د چا زوی خو نه یم، د فرشتې هغه لنډه کیسه ده چې د ډیرو پام یې د هغې لیکوالۍ ته واړاوه، په دغه کیسه کې د هغې نجلۍ د ژوند تصویر ښودل شوی چې په پښتنه ټولنه کې د دودونو په نامه په تیاره قفس کې بنده ده. فرشتې غني د خبریالۍ له دندې سره ځښته زیاته مینه ددې سبب شوه، چې هغه اوس په یوه خصوصی رسنۍ کې د خبریالې په توګه کار وکړي، د هغې د ریپوټونو ډیری موضوع ګانې د افغان ښځو د ژوند په اړه دي. اغلې غني د کلید رادیو ، مرسل اونیزې او موبي ګروپ ته هم د افغان ښځو پر وضعیت ریپوټونه چمتو کوي چې ډیر کله خپاره شوي دي.

فرشته د انسجام، او کرښې اوونیزو سره سره تاند، افغان ملت او داسې نورو بیلابیلو ویبپاڼو ته پر بیلابیلو موضوعاتو لیکنې کوي. هغه اوس په یوه خصوصی پوهنتون کې د حقوق پوهنځي محصله ده، او ددې ترڅنګ یې د ژورنالیزم په برخه کې ځینې کورسونه، او ورکشاپونه هم تعقیب کړي چې د کار په برخه کې یې ډیره مرسته ورسره کړې ده. فرشته غني په دې وروستیو کې د ښځو د حقونو د خوندیتوب لپاره هم ځینې مدني فعالینونه پیل کړي دي.

جایزې

• فرشتې غني په کلید ګروپ کې د کار په لومړي کال د غوره کارکوونکې ستاینلیک تر لاسه کړ، په لیکوالۍ کې یې هم دوه ستاینلیکونه تر لاسه کړي.
• فرشتې غني په ۲۰۱۶ کال کې د افغانستان د مدنی ټولنې مجما له خوا د آزادۍ ایوارد هم تر لاسه کړ.
• نۍ یا له آزادو رسنیو د ملاتړ ادارې په ۲۰۱۷ کال کې د ژورنالیزم په برخه کې ستاینلیک ورکړ.

لیکنې

• افغان ماشومان د ترهګرۍ اصلی ښکار
• سل کاله یوازیتوب
• اوس نو شاعره نه یم
• میرمنې دومره هم کمزورې مه ګڼه ولسمشره
• له امریکا او سلواکیا پیل شوی هنري سفر
• د سپین ژوند، ژیړ رنګ
• زما د نن کیسه