زهير شينواری

د ويکيپېډيا، وړیا پوهنغونډ له خوا
زهير شينواری

ستانه مير زهير شينواری (زوکړه ۱۳۳۲ ل کال، ننگرهار ولايت، هسکه مېنه) يو افغان پښتو ژبی اديب، ليکوال او ژباړن دی. په پښتو ژبه يې گڼ شمېر کتابونه چاپ شوي دي.

مخينه

ستانه مير زهير پر ۱۳۳۲ ل کال د ننگرهارولايت د شينوارو د هسکې مينې ولسوالۍ د ثناخېلو د سيوري په کلي کې زېږېدلی دی. لومړنۍ او منځنۍ زده کړې يې د کابل په رحمان بابا لېسه کې پر ١٣٣٩-١٣٥٠ ل کلونو پای ته رسولې دي. لوړې زده کړې يې د کابل په پولي تخنيک انستيتوت کې پر (١٣٥٢ - ١٣٥٦،٦٤_١٣٦٥ ل) پای ته رسولې او د ماسترۍ درجه يې تر لاسه کړې ده.

ښاغلي ستانه مير زهير د ستاژ دوره پر ۱۳۶۶ او ۱۳۶۷ ل کلونو د وزبکستان په علومو اکاډمۍ کې ترسره کړې ده. تر دې وروسته يې د افغانستان د علومو اکاډمۍ د څېړونکي درجه په برخه شوې.

دندې

ليکوال ستانه مير زهير پر ۱۳۵۷ ل کال د کانو او صنايعو وزارت په جيوانجنيرۍ ډيپارټمنټ کې دنده درلوده. پر (١٣٥٨ - ١٣٦٣) لمريزو کلونو د ښوونې او روزنې وزارت د تاليف او ترجمې رياست د جغرافيې د ډيپارټمنټ مسلکي غړی او د جغرافيه د بولټن مسول مدير وو. پر ۱۳۶۵ ل کال د ساختماني چارو وزارت د لارو او ډگرونو رياست د پروژه سازۍ په امريت کې د جيوانجنيرۍ مدير وو. پر ۱۳۶۵-۱۳۷۳ لمريزو کلونو يې د افغانستان د علومو اکاډمۍ د ځمکپېژندنې انستيتوت د جيولوجي ډيپارمنټ کې دنده درلوده. پر ۱۳۷۴-۱۳۸۴ لمريزو کلونو يې د بي بي سي راډيو د نوي کور نوي ژوند پروژه کې دنده ترسره کوله.

غير رسمي دندې : ستانه مير زهير د مسلکي زده کړو تر څنگ له کو چنيوالي څخه د پښتو ژبې له ادب سره هم مينه لرله. د همدغه ذوق او مينې له برکته يې په يوولسم ټولگي کې زده کړه کوله چې په ښوونځي کې د يوې ديوالي جريدې مسوليت هم ور په غاړه شو؛ تل يې په ادبي محافلو او مشاعرو کې برخه اخيستې او وخت ناوخت يې د ادب په مختلفو برخو کې قلم هم چلولی دی.

کله چې پر ١٣٥٠ ل کال په ليندۍ مياشت کې له دولسم ټولگي څخه فارغ شو نو په هغه وخت کې د دوامداره مظاهرو له امله پوهنتون رخصت شوی وو او د نوي کال لپاره يې د دولسمو ټولگيو د فارغانو څخه د کانکور ازموينه نه اخيسته. له دې لامله د ١٣٥١ ل کال په نيمايي کې د پښتو ټولنې د زيري په اونيزه خپرونه کې د مسلکي غړي په تو گه وگومارل شو. تر ١٣٥٢ ل کال د ثور تر مياشتې پورې يې په همدې اخبار کې کار کاوه.

د ١٣٥١ ل کال له پيل او د ١٣٥٢ ل کال تر پيله پورې يې په حق الزحمې توگه د هېواد ورځپاڼې د «ستاسو صفحې» متصدي هم وو. د ١٣٥٦ ل کال په دويمه نيمايي کې په داسې حال کې چې د کابل پولي تخنيک د پپنځم کال محصل وو، د پښتو ټولنې د لرغوني ادب په برخه کې د خوشال خان خټک د راټولو شوو اشعارو په نقل، مقابله او پاکنويس کې په حق الزحمي توگه همکاري لرله.

د ١٣٥٧ ل کال د ورستيو مياشتو څخه شروع او د ١٣٦٠ ل کال تر پيله په حق الزحمي توگه په راډيو افغانستان کې د هنر او ادبياتو د څانگې (کورني ژوند) د خپرونې د پښتو مطالبو ليکوال وو. د ١٣٧٤ ل په غبرگولي مياشت کې په پېښور کې د افغانستان لپاره د بي بي سي راډيو د (نوي کور، نوي ژوند) د ډرامې د ليکوال په توگه مقرر شوی او تر اوسه په همدې برخه کې خپلې دندې ته دوام ورکوي.

چاپ شوي آثار يې

  1. د زهرو گل - تصويري لنډه کيسه، دGTZ موسسې له خوا ، کابل چاپ
  2. نوی ژوند _ تصويری لنډه کيسه، د GTZ موسسې له خوا په 2008 م -کابل چاپ
  3. د عامه پوهاوي لارښود . STEP- کاونټر پارټ انټرنشنل د ټاکنو څخه د ملاتړ بهير، ١٣٨٨ ل کال چاپ
  4. زما له مينې نه توبه ده ، د لنډو کيسو ټولگه _ ١٣٨٩ ل کال چاپ
  5. د نصرالدين ټوکې (ژباړه) ، د الازهر د کتابپلورنځي چاپ
  6. جنگ های بيست ساله وتباهي ذخاير معدني افغانستان - د افغانستان د مطالعاتو مرکز_ پيښور چاپ
  7. په افغانستان کې زلزلې - داريک د گرځنده کتابونو اداره _١٣٧٨کال پيښور چاپ
  8. د افغانستان کاني زيرمې - داريک د گرځنده کتابونو اداره _ پيښور چاپ
  9. په افغانستان کې د منرالي اوبو جينې - د ١٣٨٤ل کال چاپ _ د افعانستان د کلتوری ودې ټولنه_ جرمني ( د انجنير شيرشارشاد سره په گډه ليکل شوی )
  10. د زلزلې له خطرونو به څنگه ځان ساتو؟ ( دتير فنډ موسسه ١٣٨٦ ل کال
  11. بايو گاز - ژباړه ، داريک د گرځنده کتابونو اداره _ پيښور چاپ

هغه اثار چې په گډه يې د نورو سره ليکلي

  1. د ښونځيو د پنځم ، اووم ، اتم ، نهم او لسم ټولگيو د جغرافيه کتابونه - ١٣٥٨- ١٣٦٣ کالونه
  2. اريانا دايرة المعارف - لومړی ، دويم ، دريم ، څلورم او پنځم ټوک، د علومو ا کاډمی ١٣٨٦-١٣٩٠ کال

ناچاپ اثار

  1. ودانيز توکي ( ناچاپ )
  2. غيرتي لا لا - د طنزونو ټولگه ناچاپ
  3. د ازادو شعرونو ټولگه _ ناچاپ
  4. خپل کمپوټر به څنگه ساتو ؟

سرچينې

  1. http://www.baheer.com/baher/modules.php?name=News&file=article&sid=333