محمد هاشم وطنوال

د ويکيپېډيا، وړیا پوهنغونډ له خوا
و اصلی برخی ته ورشی د پلټنې ځای ته ورټوپ کړی
محمد هاشم وطنوال

محمد هاشم وطنوال (۱۳۳۱ ل ل - د ۱۳۹۰ ل ل کال د چنگاښ ۲۶، کابل) (په انگرېزي: Mohammad Hashem Watanwal) افغان سياستوال او د ولسي جرگې مخکېنى غړى وو، چې څه موده مخکې په کابل کې د وسله والو په بريد کې ووژل شو.

مخينه

محمد هاشم وطنوال د محمد عمر زوی، پر ۱۳۳۱ لمریز کال د روزگان ولایت د مرکز ترین کوټ ښار د توري په کلي کې يې نړۍ ته سترگې غړولې وې .

زده کړې

خپلې دینې مروجې زده کړې يې له خپلو سیمه ییزو دیني پوهانو څخه وکړې . لومړنۍ او منځنۍ زده کړې يې د ترینکوټ د سیدال ناصري په لېسه او لوړې زده کړې يې د کيمیا او بیولوجۍ په څانگو کې د کابل پوهنتون د ساینس په پوهنځي کې سرته ورسولې .

دندې

وطنوال د خپل دنده ییز فعالیت په ترڅ کې د کابل ښار د ساینس مرکز او بیا د ارزگان ولایت د پوهنې مدیریت د سوپر ایزور، د پوهنې وزارت د اداري ريس او مرستیال، د هرات ولایت مستوفي، د ټولگټو (فواید عامې) وزارت د کور جوړونې د تصدۍ ريس، د کورنیو چارو وزارت د اداري ريس او مرستیال، د لوگر او خوست ولایتونو د والي او د سیمه ییزو ارگانونو د څانگې د ريس په توگه خپلې دندې ترسره کړي دي . وطنوال د روزگان ولایت د با نفوذه شخصیت په توگه له هماغه ولایت څخه د ولسي جرگې ۱۵ او ۱۶ دورې ته د خلکو د رایو په گټلو سره د وکیل په توگه بریالی شوی و و . محمد هاشم وطنوال د ولسي جرگې په ۱۵ دوره کې د خلکو د کارنده استازي په توگه د مرکزي تفتیش د کمیسیون د ریس او د درېیم خط د پارلماني گروپ د کارنده غړي په توگه هم دندې سرته رسولې دي . وطنوال په وروستیو کې (تر مړینې دمخه) د ولسې جرگې په دغه دوره کې د دفاعي چارو د کمیسیون د مرستیال په توگه دنده ترسره کوله . نوموړي د خپلو سیاسي هلو ځلو په لړ کې له خپلو نورو ملگرو سره پر ۱۳۸۲ لمریز کال د افغانستان د ملي گوند بنسټ کېښود او دا مهال د دې گوند د مشرتابه شورا غړی وو .

مړينه

د ۱۳۹۰ لمریز کال د چنگاښ د میاشتې پر ۲۶ نېټه (د ۲۰۱۱ ز کال د جولای پر ۱۶) د يکشنبې (يوه نۍ) پر ورځ د ماښام پر اتو بجو د افغان حکومت د مخالفانو له خوا د کابل ښار په څلورمه کارته کې د یو ه ترهگریز برید په ترڅ کې وويشتل شو . په ولسي جرگه کې د روزگان د خلکو د استازي محمد هاشم وطنوال جنازه د ولسي جرگې د غړو، دولتي جگپوړو چارواکیو، جهادي غړو، د کابینې د غړو ، د روزگان د قومي مشرانو، د کابل پوهنتون د استادانو ، د ملي شورا د دواړو جرگو د دارالانشاو د رئیسانو او غړو ، فرهنگیانو او د هغه د ملگرو په ملتیا د ملي شورا د الحاقیې ودانۍ په انگړ کې د جنازې د لمانځه تر ادا کولو وروسته په دارالامان کې د پارلمان د نوې ودانۍ په سیمه کې خاورو ته وسپارل شوه. د محمدهاشم وطنوال د جنازې د وړلو په مراسمو کې تر هغه وروسته چې دده ژوندليک د ولسي جرگې د منشي عبدالقادر قلاتوال له خوا ولوستل شو ، د ولسي جرگې رييس عبدالروف ابراهيمي ، محمدهاشم وطنوال د يو مدبر ښوونکي ، ټولنيز او فرهنگي شخصيت په توگه چې تل يې د ملي يووالي په ټينگښت ، د ټولنيز عدالت په تامينولو او د دموکراسۍ په ټينگښت کې ارزښتناک رول لوبولی ، وستايه او د ده وژنه يې يوه نه جبيره کيدونکې ضايع وبلله . خدای بښلي وطنوال واده کړی وو، درې زامن او څلور لوڼې ترې پاتې دي .

اخځونه

  1. http://talafghan.com/messegesandreports/mhwatanwal=biography.pdf
  2. http://wj.parliament.af/pvp/showdoc.aspx?Id=2149
  3. http://bakhtarnews.com.af/index.php?news=21377