سټيف جوبز

د اپل کمپيوټر او تکړه فونونو کمپنۍ پخوانی مشر سټيو پاول جابز

سټيف جوبز
(انګلیسي: Steve Jobs)
د شخص معلومات
زیږون نوم	(انګلیسي: Steven Paul Jobs)
پيدايښت	۲۴ فبروري ۱۹۵۵ سان فرانسسکو
مړینه	5 اکتوبر 2011 (56 کاله)  پالو التو
تابعیت	د امریکا متحده ایالات
ګوند	ديموکراتيک ګوند
عملي ژوند
دنده	فلم پروډیوسر
کاروونکي ژبه(ي)	انگليسي
ځانګړي کړنې	آيفون
جايزې
گرمي جایزه
لاسلیک
ويبپاڼه
	مخ پر IMDB باندې

سټېون پاول جابز (د ۱۹۵۵ د فبرورۍ ۲۴مه – د ۲۰۱۱ ز د اکتوبر ۵مه) یو امریکايی سوداګر، صنعتي طراح، پانګوال او د رسنۍ څښتن و. دی د اپل شرکت عمومي رئیس، اجرائیوي مشر او بنسټګر و. د پېکسار شرکت عمومي رئیس او لوی ونډه‌وال هم و او د پېکسار شرکت تر پېرلو وروسته، د والټ ډيزني شرکت د مدیره پلاوي غړی او د نېکزېټ شرکت بنسټګر، عمومي رئیس او اجرائيوي مشرهم تېر شوی دی. جابز د خپل لومړي کاروبار د همکار او د اپل له همکار بنسټګر سټیو وزنیاک سره یوځای، په ۱۹۷۰ او ۱۹۸۰ ز کلونو کې د شخصي کمپیوټرونو د انقلاب سرلاری پېژندل کېږي.

جابز، د کلیفورنیا په سنفرانسیسکو کې زېږېدلی او په زوی ولۍ د نیولو لپاره وړاندې شو. د سنفرانسیسکو په خلیجي سیمه کې لوی شو. په ۱۹۷۲ ز کال کې ریډ کالج ته ولاړ او په همدغه کال یې کالج بېرته پرېښود. دوه کاله وروسته هند ته ولاړ او هلته د روڼ‌اندۍ او د زین بوداییزم په اړه د زده‌کړو په لټه کې شو.

جابز او وزنیاک په ۱۹۷۶ ز کال کې، د اپل بنسټ کېښود، تر څو وزنیاک (Apple I) شخصي کمپیوټر وپلوري. دوی دواړو یو کال وروسته، د (Apple II) کمپیوټرونو چې ډېر بریالي کوچني کمپیوټرونه وو، په ډېر تولید سره شهرت او ګټه ترلاسه کړه.

کله چې ده «نېکزېټ» شرکت وپېره، تر هغه وروسته په ۱۹۹۷ ز کال کې د اپل شرکت اجرائیوي مشر شو. دی تر ډېره د اپل له بېرته جوړولو سره د مرستې مسـؤل و، ځکه چې اپل له ماتې سره مخامخ و. ده له طراح «جوني لوی» سره نږدې کار وکړ، تر څو د محصولاتو تولید ته وده ورکړي، چې ډېرې فرهنګي اغېزې یې لرلې. دغه کار په ۱۹۹۷ ز کال کې، له «مختلف(متفاوت) فکر وکړه» تبلیغاتي کمپاین سره پیل شو، چې د ایمک، ایټونز، ای ټونز سټور، اپل سټور، ای پاډ، اې ‌فون، اپ سټور او اپ ډور د جوړېدو لامل شو.

زېږېدنه

کله چې په ۱۹۵۴ ز کال کې شیبل او جندلي د سوریې په حمص کې له خپلې کورنۍ سره یوځای پسرلی تېر کړ، شیبل امېندواره شوه. د جندلي په وینا: شیبل قصداً دی پر دې امېندوارۍ نه و خبر کړی. دی وايي: «پرته له دې چې ما ته ووايي، دې زما په شمول هېڅوک پوه نه‌کړل او سنفرانسیسکو ته ولاړه، تر څو هلته زوی وزېږوي.»

جابز په سنفرانسیسکو کې وزېږېد او د زوی ‌ولۍ د نیولو لپاره یې یوه ښځه او خاوند ورته انتخاب کړل، چې «کاتولیک، پوه او شتمن» وو، خو دې جوړې وروسته بیا خپل نظر بدل کړ. وروسته بیا جابز پاول او کلارا جابز ته وسپارل شو، چې یوه یې هم پوهنتون نه و لوستی او شیبل د دوی له‌خوا د زوی ‌ولۍ د نیولو لپاره د سند له لاسلیک نه ډډه وکړه. شیبل وروسته دا موضوع محکمې ته کش کړه، تر څو یې زوی بلې کورنۍ ته وسپاري. وروسته له دې چې دې جوړې ژمنه وکړه چې، د جابز د پوهنتون د زده‌کړو لګښت ورکوي، پاول او کلارا ته یې د هغه ورکول ومنل. د سټیو د تره مشر زوی «بسما الجندلي» وايي چې: د جابز لومړی نوم عبدالطیف جندلي و.

مخینه

اصلي او منونکې کورنۍ

سټېون پاول جابز، د ۱۹۵۵ز کال د فبروري په ۲۴مه نېټه، د عبدالفتاح جندلي او جوان شیبل( Joanne Schieble )په کورنۍ کې وزېږېد او «پاول» او «کلارا جابز» په زوی ‌ولۍ ومانه.

د جابز بیولوژیکي (اصلي) پلار «عبدالفتاح الجندلي» د سوریې د حمص ښار په یوه عربه مسلمانه کورنۍ کې زېږېدلی او لوی شوی دی. کله یې چې د لبنان په بیروت امریکايي پوهنتون کې زده‌کړې کولې، یو فعال محصل و او څه موده د سیاسي فعالیتونو له امله بندي شوی هم دی. په ویسکونسین پوهنتون کې یې دوکتورا ته دوام ورکړ او هلته له «کارول شیبل» سره چې یوه سویسۍ او المانۍ کاتولیکه وه، ملګری شو. جندلي د دوکتورا د نوماند په توګه په هغې دورې کې مرستیال ښوونکی و، چې شیبل په کې محصله وه. د جابز بیولوژيکي خور «مونا سیمپسون» وايي چې: د شیبل مورنی نیکه او انا پر دې نه وو خوښ ،چې لور یې له یوه مسلمان سره اړیکه ولري. د سټیو جابز د ژوندلیک(بیوګرافي) لیکوال والټر ایزاکسون په دې اړه وايي چې: پلار یې  شیبل ته وګواښېده، چې«له هغه سره اړیکې پرې کړي».  

«پاول رینهولډ جابز» چې سټیو جابز یې په زوی ‌ولۍ منلی و، په ساحلي ګارد کې یې دنده لرله. د ساحلي ګارد له پرېښودو وروسته یې ، په ۱۹۴۶ ز کال کې، له «کلارا هاګوپیان» سره واده وکړ. کله چې کلارا له رحم د باندې امېندواره شوه [د حمل اخیستو یو ډول دی چې له رحم د باندې د رحم په تیوب کې تخمې سره القاح کېږي او له څه مودې وروسته د جنین د سقط سبب کېږي] د بچیانو زیږولو لپاره یې بیا هڅه ونه‌کړه او له دې امله یې، په ۱۹۵۵ ز کال کې ښه وبلله، چې بچیان په زوی ‌ولۍ ونیسي. د کلارا هاګوپیان مور او پلار هغه کسان وو، چې د ارمانیا له نسل‌ وژنې نه ژوندي پاتې شوي وو. 

واده

جابز په لومړي ځل، په ۱۹۸۹ز کال کې خپله راتلونکې مېرمن لورن پاول، هغه مهال ولیدله چې، نوموړي د سټنفورډ د کاروبار په عالي ښوونځي کې وینا وکړه او لورن پاول هلته محصله وه. تر دې پېښې وروسته، ده وویل چې: لورن «د وینا د سالون په لومړۍ لیکه کې ناسته وه او ما سترګې نه‌شوای ترې اړولای، فکري تمرکز مې ګډوډېده او سرسام کېدم.» جابز تر وینا وروسته، له هغې سره په پارکېنګ کې وکتل او د شپې د ډوډۍ لپاره یې د باندې تګ بلنه ورکړه. تر هغه وخت وروسته، دوی له کمو مواردو پرته ،د ژوند تر پایه سره یوځای وو.

د جابز او پاول لومړی بچی ریډ و، چې د ۱۹۹۱ ز کال په سپتمبر کې وزېږېد. د جابز پلار «پاول» یو نیم کال وروسته، د ۱۹۹۳ ز کال د مارچ په پنځمه مړ شو. د جابز د ماشومتوب کور، د منظرې او نندارې لپاره هم یو ښه ځای دی، چې اوس مهال د هغه د میرې [ناسکه مور] مارلین جابز اړوند دی.

جابز او پاول دوه نور بچیان هم لرل. «ارین» چې د ۱۹۹۵ ز کال په اګست میاشت کې او «ایو» چې د ۱۹۹۸ ز کال په مې کې زېږېدلې ده.

که څه هم جابز میلیاردر و، خو ویل یې چې، د بېل ګېټس په څېر به خپله ډېره شتمني بچیانو ته ورنه‌کړي. د تکنالوژۍ دغه مخکښان، په نورو کورنیو برخو کې هم سره ورته وو: دواړو د خپلو بچیانو له عمر سره  وړ او مناسبو ټولنیزو رسنیو، کمپیوټري لوبو او انټرنېټ ته د هغوی لاس‌رسی محدوداوه.

مړینه

جابز د ۲۰۱۱ ز کال د اکتوبر میاشتې په ۵مه نېټه، د کلیفورنیا په «پالو التو» کې د ماسپیښين پر مهال شاوخوا ۳ بجې په خپل کور کې د پانقرانس غدې د نري رنځ(سرطان) له امله مړ شو او هغه یې، د ساه بندېدو سبب شوه. تر مړینې یوه ورځ مخکې بې‌هوښه شوی و او د ښځې، بچیانو او خویندو په مخ کې یې ساه وخته. خور یې «مونا سیمپسون» د هغه د مړینې په اړه داسې وایي: "د سټیو وروستي کلیمات یوازې یو غږ و، چې درې ځله یې تکرار کړ. تر مړینې وړاندې یې خپلې خور پتي، بیا ډېر وخت خپلو بچیانو، خپلې مېرمنې، لورانو او ټولو ته وکتل. وروستي کلمات یې «اه وای، اه وای، اه وای» وو." وروسته بې‌هوښه شو او څو ساعته وروسته مړ شو. د ۲۰۱۱ زکال د اکتوبر میاشتې په ۷مه نېټه، د تدفین تر کوچنیو او خصوصي مراسمو وروسته خاورو ته وسپارل شو.

مخينه

جابز په سنفرانسسکو کې زېږېدلی و . دی د پال او کلېرا جابز لخوا د گڼل شوي زوي په توگه اخيستل شوی و . د جابز اصلي پلار يو د سوري هېواد مسلمان و چې نوم ېې ابو الفتح جان جاندالي و.

اپل (Apple) پيل

د اپل کمپيوټر او تکړه فونونو کمپنۍ پخوانی مشر سټيو پاول جابز