امیر سوری
امیر سوری له نهمي زیږدیزي پېړۍ څخه تر لسمي پېړۍ پوري د لرغوني افغانستان اړوند د غوري کورنۍ پښتون واکمن وو. د ځینو تاریخونو له مخي نوموړی د غوري پاچا امیر بنجي له اولادې څخه وو، چي واکمني یې د عباسي خلیفه هارون الرشید په زمانه کي د هغه د خلافت اړوند وه. امیر سوري د صفري واکمن یعقوب بن لیث الصفر سره وجنګېدی او د خراسان پرته یې د غور لویه برخه فتحه کړه. [۱] تر امیر سوري وروسته د هغه زوی محمد بن سوري واک ته ورسېدی. که څه هم امیر سوري لقب عربي وو او زوی یې هم اسلامي نوم درلود، خو دوی د کافرانو پیروي کوله او د شاوخوا مسلمانانو لخوا کافران ګڼل کیده. وروسته د محمد د زوی ابو علي بن محمد د واکمنۍ پرمهال د غوري کورنۍ په اسلامي سلطنت بدله سوه. [۲]
غوريان د غورستان له غرونو څخه راوتلي او په ګڼو قومونو وېشل سوي وه، چي له دې جملې څخه د شنساباني قوم تر ټولو ډېر واک درلود.
د غزنویانو د دورې مشهور مورخ ابوالفضل بیهقي د خپل کتاب "تاریخ بیهقی" په 117 مخ کي لیکي: "سلطان مسعود غورستان ته لاړ او خپل یو پوه ملګری یې له غور څخه د دوو کسانو سره یوځای د ژباړنانو په توګه ولېږه.