ټاډ اکین

ټاډ اکین
ټاډ اکین
د شخص مالومات
پيدايښت	۵ جولای ۱۹۴۷
مړینه
د مړینې لامل
تابعیت	د امریکا متحده ایالات
ګوند	جمهوري غوښتونکی ګوند (متحده ایالات)
عملي ژوند
کار/مسلک
کاروونکي ژبه	انګرېزي ژبه

ویلیم ټاډ اکین (د ۱۹۴۷ز کال د جولای په ۵مه زېږېدلی- د ۲۰۲۱ز کال د اکټوبر په ۳مه مړ) د امریکا جمهوري غوښتونکی سیاستوال دی، چې له ۲۰۰۱ز کال نه تر ۲۰۱۳ز کال پورې د میزوري د دویمې انتخاباتي حوزې استازی و. په نیویارک ښار کې زېږدلی و، خو لوی شوی په لوی سنټ لویس کې و. کله چې اکین په ماساچوست کې د ووسټر له پوليټکنیک موسسې نه د لسانس سند ترلاسه کړ؛ نو وروسته تر هغه یې د متحده ایالاتو د پوځ په مهندسي قطعه کې دنده پیل کړه او د کمپیوټر او فولادو په صنعت کې پر کار بوخت شو.  په ۱۹۸۸ز کال کې د میزوري د پارلمان غړی شو او تر ۲۰۰۰ز کال پورې یې په ایالتي مجلس کې خدمت وکړ. وروسته د متحده ایالاتو د پارلمان غړی شو او تر ۲۰۱۳ز کال پورې یې هلته خدمت وکړ.

په کانګریس کې یې دنده هغه مهال پای ته ورسېده، چې هغه هڅه کوله ترڅو ډیموکراټ سناتور، کلایر مک کاسکیل په ۲۰۱۲ز کال کې له خپل دریځه ګوښه کړې، چې په دې کړنه کې یې ماتې وخوړه. اکین د جمهوري غوښتونکو په مقدماتي ټاکنو کې بریالی شوی همدارنګه تر ټاکنو مخکې په وړاندوینو کې هم تر کلایر مک کاسکیل مخکې و او تر دې چې ویې ویل، ښځې د هغه څه قرباني دي، چې دی یې مشروع جنسي تېری بولي؛ نو له همدې امله په ندرت سره امیندوارې کېږي. په پایله کې اکین د دغه نظر له امله بښنه وغوښته، خو له ټاکنو نه یې د لرې کېدو غوښتنې ونه ومنلې. هغه ۳۹.۲ سلنه رایه ګټلې وې او کلایر مک کاسکیل ۵۴.۷ سلنه رایې وګټلې چې له دې سره د مک کاسکیل پر وړاندې له ماتې سره مخ شو. د ۲۰۱۴ز کال په جولای کې یو کتاب چاپ شو، چې په هغه کې اکین له خپلو لومړنیو اظهاراتو نه دفاع وکړه او ویلي یې وو، چې له خپلې بښنې پښېمان دی.

د ژوند په لومړیو کې، زده کړې او سوداګري

اکین په نیویارک ښار کې زېږدلی و او په لوی سنټ لویس کې لوی شوی و. هغه د نانسي پري (کورنی نوم: بیګلو) او پل بیګلو اکین زوی و. د اکین غور نیکه توماس راسل اکین په ۱۹۱۱ز کال کې په سنټ لویس کې د لکلدي په نامه د فولادو شرکت جوړ کړ. دغه شرکت په اخیر کې د ده نیکه ویلیم اکین او بیا یې پلار پل ته په لاس ورغی. پلار یې د هاروارډ د پوهنتون د درېیم نسل له فارغ التحصیلانو نه شمېرل کېږي، چې په دویمه نړیواله جګړه کې یې د سرتېري په توګه په سمندري پوځ  کې خدمت وکړ.

اکین له جان باروز نه، چې د سنټ لویس په ښارګوټي کې یو ابتدایي ښوونځی و فارغ شو او د ماساچوست په ووسټر کې د ووسټر له پوليټکنیک موسسې نه فارغ التحصیل شوی دی او په ۱۹۷۰ز کال کې یې د انجنیرۍ د مدیریت په برخه کې خپل لیسانس واخیست.  هغه تر فارغ التحصیلۍ وروسته د متحده ایالاتو د پوځ په ملي ګارد کې د انجینیر افسر په توګه خدمت وکړ او تر ۱۹۸۰ز کال پورې د پوځ په زېرمه ځواک کې بوخت و. دغه دنده یې پرېښوده او د آی بي ام په شرکت کې د کمپیوټري سیسټم پر عمده خرڅلاو بوخت شو او بیا وروسته پخپل کورني کاروبار کې، چې د فولادو جوړول و، پر کار بوخت شو. اکین په ۱۹۸۴ز کال کې د ماسټرۍ سند د الهیاتو په برخه کې د تړون (میثاق) له علمیه دارالعلوم نه ترلاسه کړ او هلته یې د یوناني، عبري او د مقدسو متونو د محافظه کارانه تفسیر په برخو کې مطالعات پیل کړل، خو کلیسا ته ور ونه ګرځېد.

اکین له ډېرې مودې راهیسې د جنین د سقط کولو فعال مخالف و او یو مهال په میزوري کې د جنین د سقط د مخالفانو د ټولنې غړی و. اکین په ایلینوی او میزوري کې د جنین د سقط کلینیکونو مخې ته لاریونونه کول؛ نو لږ تر لږه اته ځلې د ۱۹۸۵ز او ۱۹۸۸ز کال ترمنځ له قانون نه د سرغړونې په تور بندي شو. هغه ویل چې لاریونونه یې په سوله ییز ډول وو او د خپلو افکارو د دفاع لپاره به بښنه ونه غواړي. په هغه وخت کې یې د «ویلیم اکین» نوم ځانته کاراوه. له هغه مهاله وروسته، کله چې سیاست ته راغی؛ نو له «ټاډ اکین» نوم نه یې کار واخیست.

ټاکنې

اکین په ۱۹۸۸ز کال کې د میزوري د پارلمان غړیتوب لپاره وټاکل شو او پرته له مخالفته یې په لوېدیځ ښار کې د ۸۵ ناحیې د استازیتوب لپاره ګډون وکړ. هغه په ۱۹۹۰ز  کال کې د دویم ځل لپاره د ۵۹ سلنه رایه په اخیستو سره بیا وټاکل شو. دا چې دغې ناحیې بدلون وکړ؛ نو اکین له ۱۹۹۳ز نه تر ۲۰۰۰ز کال پورې د ۸۶ناحیې استازی و او هېڅکله یې تر ۶۶ سلنه لږې رایې نه دي ترلاسه کړې.

د متحده ایالاتو پارلمان

ټاکنې

په ۲۰۰۰ز کال کې جیم تلنټ د متحده ایالاتو استازی، چې ځان یې د فرماندارۍ لپاره نوماند کړی و؛ له خپل مقامه ګوښه شو او اکین د پارلمان د څوکۍ نیولو لپاره د جمهوري غوښتونکو په مقدماتي ټاکنو کې ګډون وکړ. د باران د ډېر اورښت له امله د رای ورکوونکو شمېر لږ شو او دې چارې له اکین سره مرسته وکړه، چې په مقدماتي ټاکنو کې یوازې په ۵۶ رایو بریالي شي. هغه دوو نامتو نوماندانو؛ جین مکناري د سنټ لویس پخوانی اجرایي مدیر او فرانک فلوترون ایالتي سناتور ته ماتې ورکړه. اکین په هغه شپه چې دی ګټونکی شو ویې ویل: «زما په انتخاباتي مرکز کې به زلزله وشي». اکین په ټولټاکنو کې ټډ هاوس، چې ډیموکراټ ایالتي سناتور و، له ۵۵ سلنه رایو سره مات کړ. هغه بیا هېڅکله هم له داسې جنجالي سیالیو سره مخ نه شو او د پینځو ځلونو لپاره بیا بیا وټاکل شو. اکین په ۲۰۱۰ز کال کې د ۶۷.۹سلنه رایو په اخیستو سره یو ځل بیا وټاکل شو.

د واک دوره

اکین په ۲۰۰۸ز کال کې د امریکا له محافظه کارې اتحادیې نه ۹۶سلنه امتیاز او په ۲۰۰۷ز کال کې یې ۱۰۰سلنه امتیاز ترلاسه کړ.

اکین د واک په دوره کې د پارلمان په رسمي فهرست کې د «سنټ لویس استازي» په توګه ثبت شوی و، په داسې حال کې چې د هغه په سیمه کې د سنټ لویس هېڅ کومه برخه نه وه.

په ۲۰۱۲ز کال کې د متحده ایالاتو د سنا ټاکنې

د ۲۰۱۱ز کال د می په وروستیو کې اکین اعلان وکړ، چې د جمهوري غوښتونکو له خوا به د ۲۰۱۲ز کال ټاکنو لپاره نوماند وي ترڅو دیموکراټ سناتور کلایر مک کاسیکل ګوښه کړي. د ۲۰۱۲ز کال په اګسټ کې د جمهوري غوښتونکو په مقدماتي ټاکنو کې نور نوماندان دا دي: سوداګر جان برونر، لیکوال او د سوداګرۍ مدیر مارک ممولي او د میزوري پخوانۍ خزانه داره سارا استیلمن وو، چې د ټي (Tea)  د ګوند له ملاتړه برخمن وو. په یوه جنجالي ډګر کې بیا هم اکین د اګسټ په ۷مه د جمهوري غوښتونکو په مقدماتي ټاکنو کې ځان نوماند کړ، چې له ۳۰سلنه نه تر ۳۶سلنه رایې یې ترلاسه کړې. د کلایر مک کاسکیل کمپاین سربېره پر دې چې اصلي سیال یې نه درلود؛ نو له دې سره سره یې په خپلو مقدماتي سیالیو کې ۲ میلیونه ډالر هم مصرف کړل. دغه پیسې یې د اکین په اړه د تبلیغ لپاره مصرف کړې، چې هغه د میزوري لپاره «له حده وتلی محافظه کار» دی.

اکین په عمومي ټاکنو کې له مک کاسکیل او لیبرټاني نوماند جاناتان داین سره مخامخ شو او د تېري په اړه یې تر جنجالي نظرونو وروسته له مک کاسکیل نه ماتې وخوړه.

د ټاکنو پایلې

مخکې تر دغو نظریاتو، اکین په خپله سیالۍ کې د مک کاسکیل پر وړاندې د بریا لپاره د وګړو له خواغوره شوی و، خو هغه په نومبر کې د ۵۴،۷ سلنه رایو په مقابل کې ۳۹.۲ سلنه رایې واخیستې او ماته یې وخوړه. تر ټاکنو وروسته، اکین د ۲۰۱۲ز کال د نومبر او د ۲۰۱۳ز کال د اګسټ ترمنځ ۱۱۱۰۰۰ ډالره مالي مرسته ترلاسه کړه، چې یوه برخه یې په ۲۰۱۸ز کال کې د سنا د مقدماتي ټاکنو لپاره وې، خو د ۲۰۱۳ز کال د جنورۍ په ۳مه یې د ولسمشرۍ له پای ته رسېدو وروسته هغه ځای پرېښود.

شخصي ژوند

اکین د ۱۹۷۵ز کال په جون کې له لولي بو سره واده وکړ، لولي له هالینز پوهنتون نه فارغه شوې وه. هغوی د شپږو اولادونو څښتنان شول. لولي په کور کې د زده کړې پلوې وه؛ نو له همدې امله یې ټول اولادونه په کور کې وروزل شول. درې زامن یې په اناپولیس کې د متحده ایالاتو د سمندري ځواک اکاډمۍ ته لاړل او د متحده ایالاتو د سمندري سرتېرو غړي شول. کله چې د عراق پر فلوجه ښار یرغل کېده؛ نو یوه زوی یې په دغه یرغل کې ګډون درلود. اکین او مېرمنې یې له ډېرې مودې راهیسې د اکین د کوچنیوالي د دورې په کور کې ژوند کاوه، دغه کور یې له پلاره ورته پاتې و، چې د میزوري ایالت په تون اند کانټري کې و.

روغتیا او مړینه

اکین د ۲۰۰۱ز کال په اپرېل کې د پروستات د سرطان لپاره(په لومړیو مرحلو کې و) عملیات وکړ. هغه د ۲۰۲۱ز کال د اکټوبر په ۳مه ، د ۷۴ کلونو په عمر د سرطان له امله په خپل کور کې ومړ.