جنسي غلامي

جنسي غلامي
څنګزنې وېشنيزې	غلامي، جنسي تاوتریخوالی
ګډونوال	sex slave، pimp
ويکيډاټا کې مالومات سمول

جنسي غلامي یا جنسي استثمار په یو یا څو کسانو باندې د ملکیت د داسې حق منل دي چې له مخې یې هغوی په جبري ډول اړ کېږي جنسي چارې ترسره کړي. په دغه چاره کې اجباري کار، د خادم/خدمت کوونکي کچې ته د یو کس د وضعیت را کښته کول (له دې ډلې په زوره واده) او د جنسي فعالیت لپاره انساني قاچاق لکه د جنسي چارو لپاره د ماشومانو قاچاق په کې شاملېږي.

تاریخي موارد

لرغونی یونان او د روم سترواکي

په هلنیستي او رومي نړۍ کې د فحشا په موخه د ښځینه او کله هم د نارینه و غلامانو کارونه دود وه. په ادبیاتو، حقوقو، پوځي راپورونو او هنر کې د هغو ثابتونکې پریمانه مراجع شتون لري. په یوناني – رومي ټولنه کې د جنسي تمایلاتو د محدود کوونکو اخلاقي قوانینو بهر فاحشو (غلامو یا آزادو) شتون درلود او له ډېر کم قانوني ملاتړ برخمنې وې. د بېلګې په توګه د جنسي تېري اړوند د لرغوني روم قانون وګورئ. له یوې غلامې سره د نارینه یوځای والی په هېڅ یوه ټولنه کې زنا نه ګڼل کېده.

آسیا

غلامي تر ډېره په لرغوني چین کې شتون درلود. پر ویتنام باندې د چین د واکمنۍ پر مهال نانئويي (Nanyue) نجونې په چینايانو باندې د جنسي غلامانو په توګه وپلورل شوې. دغې سوداګرۍ وده وکړه او د چین د سوېل څخه به بومي نجونې د شمال چینایانو ته راوړل کېدلې. د فوجیان او ګوئیژو بومي وګړي هم د دغه ډول غلامۍ لپاره سرچینه وه. سویلي یوئي نجونې د چیني ادبیاتو او هغو شعرونو په واسطه چې سوېل ته د تبعید شوو چینایانو له خوا ویل کېدل له جنسي پلوه تحریک کېدلې.

په ۱۶ مه او ۱۷ مه پېړیو کې پرتګالي سیاحینو او د هغوی د سویلي آسیا (ځینې مهال افریقايي) پوځي بېړۍ چلونکو به له جاپان نه ځانته غلامان پېرل دوی به جاپانۍ ښځې او نجونې پېرلې او ځینې مهال به یې هم د اسیرانو په توګه نیولې چې بیا به یې په خپلو بېړیو کې د جنسي غلامانو په توګه کارولې او له ځانه سره به یې ماکو او یا د اسیا په سویل، امریکا لویه وچه او هند کې به یې نورو پرتګالي مستعمرو ته وړلې. د بېلګې په توګه د ۱۶ مې پېړۍ په وروستیو او د اوولسمې پېړۍ پر مهال په هندي پرتګالي مستعمره، ګوا کې د جاپاني غلامانو ټولنې شتون درلود.

د دویمې نړیوالې جګړې پر مهال د جاپان سترواکۍ د «آرامه کوونکو ښځو» په نامه یو دولتي سیسټم رامنځته کړ، دغه اصطلاح د پوځ لپاره جنسي غلامانو ته کارول کېده چې ډېری یې کوریايي، چینايي او فلیپیني ښځې وې او شمېر یې نږدې ۲۰۰ زرو تنو ته رسېد؛ دوی اړویستل شوې وې چې د دویمې نړیوالې جګړې پر مهال د جاپان د پوځ په «آرامه کوونکو ځایونو» کې جنسي غلامي وکړې.

متحده ایالات

د شمالي امریکا په مستعمراتو کې د افریقايي غلامي په پیل سره د افریقايي نجونو او ښځو جنسي ځورونه عامه شوه. یو شمېر تاریخ پوهان ادعا کوي چې سپین پوستو نارینه و به ځینې مهال افریقايي ښځې د ځان لپاره د جنسي اړتیاوو د پوره کوونکو یا معشوقو په توګه کارولې. د هغوی د نفوسو په زیاتوالي سره  ځمکو لرونکو، د کارګرانو سپین پوستو ناظرینو، د ځمکو لرونکو ځوانو زامنو به له واده وړاندې او وروسته او همدارنګه له غلامانو سره ښکېلو نورو سپین پوستو نارینه و به له غلامانو څخه جنسي ناوړه ګټنه کوله. یو شمېر افریقايي غلامې ښځې او نجونې به په پشپړ ډول په فاحشه خانو پلورل کېدلې.

نن ورځ

افریقا

په نولسمه او شلمه پېړۍ کې اروپايي استعماري ځواکونو په افریقا کې غلامي له منځه یووړه. له دې سره د هغوی له قضایي حوزې بهر سیمو لکه د سوډان په مهدوي سترواکۍ کې دغې چارې خپلې ودې ته دوام ورکړ. سازماني غلامي په ټوله نړۍ کې منع شوه خو په هغو سیمو کې چې اغېزمن دولتي کنټرول شتون نه لري لکه په سوډان، لیبریا، سیرالئون، شمالي یوګانډا، کانګو، نایجریا او موریتانیا کې د ښځینه جنسي غلامانو د شتون ګڼ شمېر راپورونه شتون لري. په ګانا، توګو او بنین کې د تروکوسي («آئیني بندګي») په نامه مذهبي فحشا شتون لري چې په سنتي عبادت ځایونو کې په زور سره زرګونه نجونې او ښځې د «خدایانو د مېرمنو» په توګه ساتي؛ چېرې چې کشیشان د خپلو خدایانو په ځای کې له هغوی سره جنسي اړیکې ترسره کوي.

د ۲۰۱۴ زکال په اپرېل میاشت کې بوکو حرام ډلې د نایجریا له چیبوک، بورنو ایالت څخه ۲۷۶ نجونې زده کوونکې وتښتولې. له هغو څخه له ۵۰ زیاتې ترې ډېر ژر وتښتېدې او پاتې نورې خوشې نه شوې. پر ځای یې ابوبکر شکوي چې د متحده ایالاتو د بهرنیو چارو وزارت د هغه په اړه د داسې معلوماتو په ورکولو ۷ میلیون ډالر جایزه ټاکلې چې د هغه د نیولو لامل وګرځي؛ اعلان وکړ چې غواړي دغه نجونې د غلامۍ په موخه وپلوري.

د امریکا لویه وچه

په ۲۰۰۶ زکال کې سانفرانسیسکو کرونیکل ورځپاڼې راپور ورکړ چې په ۲۱ مه پېړۍ کې له سویلي امریکا، سویل ختیځې اسیا، ختیځې اروپا او د پخواني شوروي اتحاد له هېوادونو څخه نجونې متحده ایالاتو ته د جنسي غلامۍ په موخه قاچاق کېږي. په ۲۰۰۶ زکال کې د ABC News نیوز په یو راپور کې څرګنده شوه چې د موجودو غلطو انګېرنو پر خلاف امریکايي وګړي هم کېدای شي جنسي غلامۍ ته اړ ویستل شي.

په ۲۰۰۱ زکال کې د متحده ایالاتو د بهرنیو چارو وزارت پخلی وکړ چې هر کال له ۵۰ زرو څخه تر ۱۰۰ زرو نجونې او ښځې متحده ایالاتو ته قاچاق کېږي. په ۲۰۰۳ زکال کې دغه وزارت راپور ورکړ چې په ټولیزه توګه له ۱۸ زرو څخه تر ۲۰ زره کسانو پورې د اجباري کار او یا هم جنسي استثمار په موخه متحده ایالاتو ته قاچاق شوي. د ۲۰۰۴ زکال د جون میاشتې په کلني راپور کې پخلی شوی و چې هر کال له ۱۴۵۰۰ څخه تر ۱۷۵۰۰ تنه دغه هېواد ته قاچاق کېږي. د بوش ادارې د عدلیې وزارت په اډانه کې ۴۲ قاچاق ضد ډلګۍ جوړې کړې او د انساني قاچاق د کمښت په موخه یې له ۱۵۰ میلیون ډالرو زیات ولګول.

آسیا

مرکزي او لویدیځه آسیا

د انساني قاچاق اړوند د متحده ایالاتو د بهرنیو چارو وزارت د ۲۰۰۷ زکال راپور څرګندوي چې د فارس خلیج په عربي هېوادونو کې جنسي غلامي تر اوسه شتون لري، چېرې چې ښځې او ماشومان د شوروي اتحاد له پخوانیو هېوادونو، ختیځې اروپا، لرې ختیځ، افریقا، سویلي اسیا او د منځني ختیځ له نورو ځایونو څخه دلته قاچاق کېږي.

د ۲۰۱۴ زکال په وروستیو کې د رسنیزو راپورونو له مخې د عراق او شام لپاره اسلامي دولت (داعش) ایزدي او عیسوي ښځې په غلامۍ پلورلې. د ۲۰۱۴ زکال د اکټوبر په نیمايي کې ملګرو ملتونو پخلی وکړ چې له ۵۰۰۰ څخه تر ۷۰۰۰ ایزدي ښځې او ماشومان د داعش ډلې له خوا تښتول شوې او په غلامۍ پلورل شوې.

اروپا

په هالنډ کې د انساني قاچاق سره د مبارزې ادارې په ۲۰۰۵ زکال کې اټکل وکړ چې هر کال له ۱۰۰۰ څخه تر ۷۰۰۰ تنه د قاچاق قربانیان شتون لري. د پولیسو ډېری څېړنې قانوني جنسي سوداګرۍ ته اړوندې دي چې د فاحشه خانو ټول اړخونه په ښه توګه څرګندوي، خو له دې سره پنجروي فاحشه خانې هم په زیاته کچه شتون لري. د Expatica په نوم هالنډي خبرې ویب پاڼې راپور خپور کړ چې په ۲۰۰۸ زکال کې په هالنډ کې د قاچاق ۸۰۹ قربانیان ثبت شوي چې له دې شمېرې څخه یې ۷۶۳ ښځینه وې او لږ تر لږه ۶۰ سلنه یې د سکس په صنعت کې کار کولو ته اړویستل شوې.

له ختیځې اروپا څخه جرمني ته د ښځو قاچاق تر ډېره د هماغو سیمو د وګړو له خوا ترتیب کېږي. جرمني چارواکو په ۲۰۰۸ زکال کې د جنسي قاچاق ۶۷۶ قربانیان تشخیص کړي چې دغه شمېره په ۲۰۰۷ زکال کې ۶۸۹ تنه ښول شوې.

په ۲۰۰۸ زکال کې په یونان کې د غیر دولتي بنسټونو د شمېرو له مخې ښوول شوې چې کېدای شي په دغه هېواد کې په ټولیزه توګه له ۱۳۰۰۰ څخه تر ۱۴۰۰۰ تنو پورې د هر ډول قاچاق قربانیان په هر مهال کې شتون ولري. د قاچاق د قربانیانو اصلي هېوادونه نایجریا، اوکراین، روسیه، بلغاریا، البانیا، مولداوي، رومانیا او بلاروس دي.

د سویس پولیسو په ۲۰۰۶ زکال کې پخلی وکړ چې کېدای شي له ۱۵۰۰ څخه تر ۳۰۰۰ تنو پورې د قاچاق قربانیان شتون ولري. طراحان او قربانیان یې په عمومي توګه د هنګري، سلواکیا، رومانیا، اوکراین، مولداویا، لیتوانیا، برازیل، دومنیکن جمهوریت، تایلنډ، کمبودیا هېوادونو وګړي او په لږ کچه افریقایان دي.

په ۲۰۰۷ زکال کې په بلجیم کې قضایه قوې د قاچاق ۴۱۸ قضیې څېړلې چې له دغو څخه یې ۲۱۹ د اقتصادي ناوړه ګټنې او ۱۶۸ یې هم د جنسي ناوړه ګټڼې دوسیې دي.