ششیکلا کاکوډکر

ششیکلا کاکوډکر (زوکړه: د ۱۹۳۵ زکال د جنوري ۷مه – مړینه: د ۲۰۱۶ زکال د اکتوبر ۲۸مه) چې په تای (معنی یې مشره خور) یې شهرت درلود، په هند کې د ماهاراشتراوډي ګومنټاک ګوند له مخکښو مشرانو څخه وه. نوموړې دوه ځله د ګوا، ډمن او ډیو عالي وزیره او همدارنګه د ماهاراشتراوډي ګومنټاک ګوند مشره وه. نوموړې د ګوا لومړنۍ او یوازنۍ ښځینه (تر ۲۰۲۳ زکال پورې) عالي وزیره وه.

لومړنی ژوند او مخینه

ششیکلا کاکوډکر د ۱۹۳۵ زکال د جنوري په اوومه نېټه د پرتګالي هند د ګوا ایالت په پرنم کې وزیږېده؛ نوموړې د ډاینانډ او سونان ډابي بانډوډکر لومړنۍ ماشومه وه.

کاکوډکر ابتدايي زده کړې په مشټی فانډ ښوونځي کې وکړې او د پنجي له پیپل عالي لیسې څخه فارغه شوه. د یوولس کلنۍ په عمر نوموړې د وطن پرستانه شعارونو په ورکولو سره د ګوا د آزادۍ په خوځښت کې ورګډه شوه او د پرتګالي پولیس افسرانو له خوا وډبول شوه. نوموړې د دهارواړ له کارناټاک پوهنتون څخه د انسان پوهنې، ټولنپوهنې او تاریخ په برخو کې د لیسانس سند ترلاسه کړ. هغې د ماسټرۍ زده کړې د ممبۍ په الفینسټون کالج کې بشپړې کړې.

په ۱۹۶۳ زکال د ګوا، ډمن او ډیو د مقننه شورا لومړنۍ ټاکنې په ډراماتیکه بڼه ترسره شوې چې په پایله کې یې پلار ډایاناند بانډوډکر اعلی وزیر وټاکل شو. همدغه کال نوموړې له ګوروډات کاکوډکر سره واده وکړ او په ۱۹۶۸ زکال کې د بانډوډکر شرکتونو د کاري ډلې عمومي مدیره شوه. سربېره پر دې د ځوانانو د سره صلیب د ټولنې، د آل انډیا د ښځو د کنفرانس او د ټولنیز هوسا ژوند د مرکزي پلاوي غړې وه. هغه د خپل ځواک بنسټ د دولتي ښوونځیو د ابتدایي زده کړو د ښوونکو په مرسته جوړ کړ.

په سیاست کې شامل کېدل

ششیکلا کاکوډکر وروسته له هغه چې په ممبۍ کې د ماسټرۍ له زده کړو څخه ګوا ته راوګرځېده په ټولنیزو چارو کې بوخته وه. نوموړې په ۱۹۶۷ زکال د ګوا، ډمن، ډیو مقننې شورا ته په ټاکنو کې د پونډا له انتخابي حوزې څخه د ماهاراشتراوډي ګومنټاک ګوند په استازولۍ ځان نوماند کړ چې په غوڅ اکثریت یې ټاکنې وګټلې او په دې سره د ګوا، ډمن او ډیو په مقننه شورا کې دویمه ښځینه استازې شوه. د ۱۹۷۲ زکال پر مهال د یادې شورا په راتلونکو ټاکنو کې کاکوډکر د بیچولیم له ټاکنیزې حوزې څخه د یاد ګوند په استازولۍ سیالي وکړه او بریالۍ شوه.

د دولت وزارت

په ۱۹۷۲ زکال کې د ټاکنو له ګټلو وروسته نوموړې د خپل پلار ډاینانډ بانډوډکر په مشرۍ حکومت کې مشاور وزیره وټاکل شوه. نوموړې د ښوونې او روزنې، عامې روغتیا، ټولنیزې هوساینې، عامه مرستو او د کوچنیو پانګونو په برخو کې مسئولیتونه لرل. د ۱۹۷۳ زکال د اګست په ۱۲مه یې پلار په داسې حال کې ومړ چې برحاله اعلی وزیر و؛ له همدې امله د ماهاراشتراوډي ګومنټاک ګوند قانون جوړونکو غړو د رایو په اتفاق راتلونکې اعلی وزیره وټاکله.

د اعلی وزیرې په توګه پیلنۍ چارې

د اعلی وزارت لومړنۍ دوره

ششیکلا کاکوډکر د ۱۹۷۳ زکال د اګست په دیارلسمې نېټې د شپې په ۱۱:۲۰ دقیقو د ګوا، ډمن او ډیو د مرستیال ګورنر سیسرکومار برنجي پر وړاندې په راج بهاون ماڼۍ کې لوړه وکړه. له کاکوډکر سره یوځای پرتاب سېنګ ران او اې. کې. اس اوسګاونکار د کابینې د وزیرانو په توګه لوړه وکړه. د مشاوریت اړونده څوکۍ یې د دورې تر پایه خالي پاتې شوه. کاکوډکر د خپل پلار پر ځای د ګوند مشره هم شوه او د دواړو څوکیو مسئولیت یې په ۱۹۷۷ زکال کې د ګوا د مقننه شورا تر ټاکنو پورې پر غاړه درلود.

کاکوډکر یوولس هغه دندې چې پلار ته یې اړوندې وې پر غاړه واخیستې او همدارنګه یې څلور نوي مسئولیتونه هم ځانته وټاکل. په دغو کې عمومي مدیریت، د ګوند د مشرۍ څوکۍ، کورنۍ چارې، مالي چارې، د استخباراتو او محرمو چارو اداره، صنعت، د عامه چارو اداره، زده کړې، اطلاعات او تورېزم، عامه روغتیا، کوچنۍ پانګونې، عامه مرستې، څارنوالي، ټولنیزه هوساینه او د ګوا آرشیف شامل وو.

د هند په ملي کانګرس ګوند کې شاملېدل

هغه مهال چې په ګوا کې د هند د ملي کانګرس جلا شوې څانګه د اندراګاندي په مشري د هند د ملي کانګرس ګوند سره مل شوه، د ماهاراشتراوډي ګومنټاک ګوند ته اړوند پنځه د پارلمان غړي (ویشنو راما نایک، ډیو ماندرکار، نارسینهبای تاندل، وینایاک چودانکار او سامجیبای سولانکی) هم په ۱۹۸۰ زکال کې له یاد ګوند سره مل شول. د ۱۹۸۰ زکال د مارچ میاشتې په ۲۰مه نېټه په نوي ډهلي کې عبدالرحمن انټولي اعلان وکړ چې ششیکلا کاکوډکر له خپلو پیروانو سره د هند د ملي کانګرس ګوند سره یوځای شوې ده. د ۱۹۸۰ زکال د مارچ په ۲۲مه کاکوډکر اعلان وکړ چې د ماهاراشتراوډي ګومنټاک ګوند اجرایوي مسئولین هوکړې ته رسېدلي چې دغه ګوند د هند د ملي کانګرس ګوند سره ادغام کړي. دا په دې معنی و چې دوی غواړي یاد ګوند په بشپړه توګه منحل کړي. کاکوډکر د خپلې دغې پرېکړې لامل دا وباله چې غواړي د سیاست په اصلي جریان کې ځان شامل کړي.

له ۱۹۹۰ زکال وروسته سیاستونه

ششیکلا کاکوډکر په ۱۹۹۴ زکال کې د مایم ټاکنیزې حوزې څخه د ماهاراشتراوډي ګومنټاک ګوند په استازولۍ د ګوا مقننه شورا ته لار ومونده. په ۱۹۹۹ زکال کې کاکوډکر د ګوا په مقننه شورا کې د یاد ګوند په استازولۍ بیا ټاکنو ته ودرېده، خو د بهارتیا جاناتا ګوند د استازي پرکاش فادته پر وړاندې یې ماته وخوړه. کاکوډکر د مایم ټاکنیزې حوزې څخه په خپلو وروستیو ټاکنو کې د هند د ملي کانګرس د ګوند د استازي هاریش زانتیه پر وړاندې ماته شوه. د ۲۰۰۲ زکال په ټاکنو کې له ماتې وروسته نور نو نوموړې په ټاکنو کې ونډه وانخیسته.

نورې څوکۍ

ششیکلا کاکوډکر د کالا د اکاډمۍ د مشرې په توګه خدمت وکړ. نوموړې همدارنګه د ګوا، ډمن او ډیو د صنعتي پراختیايي شرکت مشره؛ د ګوا، ډمن او ډیو ایالت د سپورت د شورا مشره؛ د ګوا د سرطاني ټولنې مشره؛ د سره صلیب د کمېټې مشره (د ګوا د څانګې) او د ماراتي بهاون نیرمان د کمېټې کاري مشره وه. د ۱۹۹۸ زکال په اکتوبر میاشت کې کاکوډکر د ګوا د بالا بهاون مشره وټاکل شوه.

له ۱۹۹۱ زکال څخه تر ۱۹۹۲ زکال پورې کاکوډکر د ګوا په مقننه شورا کې د شکایتونو د کمېټې د مشرې او د عمومي شرکتونو د کمېټې د غړې په توګه فعالیت کاوه.

کاکوډکر همدارنګه په پنجي کې د پنجي د جیم خانې د کلب د مشرې په توګه خدمت وکړ.

ټولنیز فعالیتونه او بشري چارې

ششیکلا کاکوډکر د ګوا له فوټبال ټولنې سره د بانډوډکر د طلايي جام په بېرته رامنځته کولو کې مرسته وکړه. کاکوډکر د ګڼ شمېر ټولنیزو او مذهبي بنسټونو ملاتړې وه.

جایزې او ویاړونه

ششیکلا کاکوډکر ته په ۲۰۱۴ زکال کې د هارواړ ښار کرناټاک پوهنتون افتخاري دوکتورا ورکړه.

مړینه

کاکوډکر د ۲۰۱۶ زکال د اکتوبر په ۲۸مه د پنجي په التینهو کې د خپل پلار بانډوډکر په کور کې له یوې اوږد مهالې ناروغۍ وروسته مړه شوه. د ګوا دولت د هغې د مړینې له امله دوه ورځې عمومي ماتم اعلان کړ. د نوموړې مړی د ۲۰۱۶ زکال د اکتوبر په ۲۹مه د پنجي په سنټ اینز کوره کې په بشپړو دولتي مراسمو کې وسوزول شو.