جیمز سیلېټ

جیمز سیلېټ
جیمز سیلېټ
د شخص مالومات
پيدايښت
مړینه
تابعیت	لويې برېتانيا پاچايي د برېتانيا او ايرلينډ متحده پاچايي
عملي ژوند
کار/مسلک
کاروونکي ژبه	انګرېزي ژبه
د کړنې څانګه	انځورکښنه

جیمز سیلېټ (James Sillett؛ زوکړه: د ۱۷۶۴ زکال د می ۱۶ مه – مړینه: د ۱۸۴۰ زکال د می ۶ مه) د بې روحه شیانو او مناظرو انګلیسي نقاش او هنرمند و. نوموړي ځان د نورویچ مکتب د مخکښ نقاش په توګه څرګند کړ؛ په داسې حال کې چې د نوموړي ډیری آثار د طبیعي مناظرو او بې روحه شیانو نقاشیو ته اړوند دي، خو د طراحۍ او میناتورۍ ښوونکی هم و. له بوټو څخه د هغه نقاشۍ جزیاتو ته د ډېر دقت او پام له امله ستایل شوې. دغه نقاشۍ او له بې روحه شیانو څخه د هغه نورې نقاشۍ د نوموړي په تر ټولو غوره اثارو کې راځي چې له امله یې یو شمېر کارپوهان نوموړی له ویلیام جکسون هوکر سره پرتله کوي چې د هغه انځورونه هم کره او جذب کوونکي و. له بوټو څخه د هغه کره نقاشۍ تر ډېره پورې د بوټو اړوند کتابونو کې د بوټو د انځورونو لپاره کارول شوې. د هغه نقاشۍ تر ډېره پورې د اتلسمې پېړۍ د استادانو د نقاشیو تر اغېز لاندې راغلي او له همدې امله د علمي سبک لرونکې دي چې پر بنسټ یې هغه په نورویچ کې له خپلو هم دوره نقاشانو جلا بلل کېږي. نوموړي خپل آثار د ۱۷۹۶ او ۱۸۳۷ زکال پر مهال په سلطنتي اکاډمۍ کې نندارې ته وړاندې کړل.

سیلېټ په نورویچ کې وزېږېد او همالته یې زده کړې وکړې؛ نوموړي د خپل هنري ژوند ډېره برخه همدلته تېره کړه. نوموړي لندن ته له سفر وړاندې له نورویچي نښان جوړونکي سره شاګردي وکړه او لندن ته له سفر کولو وروسته یې په پولي ګرافیک ټولنه کې د کاپي لیکونکي دنده ترلاسه کړه. نوموړي له نورویچي هنرمند ویلیام کاپون سره په ګډه په دروری لین یا سلطنتي تیاتر او د کاونټ ګارډن په نامه د لندن په سلطنتي اوپرا کې منظرې نقاشي کړې. نوموړي ادعا کړې چې له ۱۷۸۷ زکال وروسته یې تر ۱۷۹۰ زکال پورې په سلطنتي اکاډمۍ کې زده کړې کړې، خو د دغو موضوع تائید کوونکي شواهد شتون نه لري.

سیلېټ په ۱۸۰۱ زکال کې د ختیځ درهام له اوسېدونکې آن بانیارډ سره واده وکړ. په ۱۸۰۴ زکال هغوی له لندن څخه نورفولک ته کډه شول څو په کینګز لین کې ژوند وکړي؛ چېرې چې سیلېټ د ریچارډز د History of Lynn لپاره یو شمېر هنري آثار تولید کړل. نوموړی په ۱۸۱۱ زکال کې له خپلې کورنۍ سره په نورویچ کې استوګن شو. همالته نوموړي د نورویچ د هنرمندانو د بنسټ غړیتوب ترلاسه کړ چې بیا په ۱۸۱۴ زکال کې د دغه بنسټ مرستیال او یو کال وروسته یې هم مشر شو. سیلېټ د ګلانو د نقاشۍ د لارښود او په نورویچ کې د کلیسا ګانو، معبدونو او نورو عامه وانیو د مناظرو په نوم (A Grammar to Flower Painting, and Views of the Churches, Chapels and Other Public Edifices in the City of Norwich) اثر خپور کړ چې په دغه اثر کې د هغه له خوا توپوګرافیکو رسامیو د ۱۹مې پېړۍ پر مهال په دغه ښار کې د له منځه تللو معماریو اړوند کره او ارزښتمن معلومات وړاندې کول. نوموړی په ۱۸۴۰ زکال کې ومړ او د دغه ښار په روزاري نومې هدیره کې خښ کړای شو. د هغې لور ایما سیلېټ چې د ده نوم یې ژوندی وساته، د ګلانو نقاشۍ یې کولې او ویل کېږي چې د خپل پلار تر ټولو مخکښه سیاله وه.

مخینه

د نورویچ د نقاشانو د مکتب هنرمندان چې سیلېټ هم ورته اړوند و د جغرافیايي موقعیت، د نورویچ او کلیوالي نورفولک د جوړښت او همدارنګه د نږدې شخصي او حرفوي اړیکو له مخې له یو بل سره تړلي و. د دغه مکتب په مخکښو هنرمندانو کې جان کروم، جوزف سټنارډ، جورج وینسنټ، رابرټ لډبرورک، جیمز سټارک، جان ټریټل او جان سل کټمن شامل و. نورویچ له لندن څخه بهر لومړنی انګلیسي ښار و چې دغه ډول مکتب په کې شتون درلود او له بل هر ځای څخه یې ډېر سیمه ئیز هنرمندان لرل. د دغه ښار نمایشي، هنري، فلسفي او موسیقاري کلتور په داسې توګه وده وکړه چې د بل هر ایالتي ښار په پرتله ځانګړی و.

د نورویچ د هنرمندانو ټولنې چې د نورویچي مکتب ډیری غړي ورته اړوند و د نورفولک د هنرمندانو له ګروپي اړتیاو څخه چې باید د یو بل او همدارنګه د خپلو شاګردانو په روزلو کې یې ترې کار اخیستی وای؛سرچینه اخیسته. دغه ټولنه په ۱۸۰۳ زکال کې تاسیس شوه او د هنرمندانو ترمنځ د نورو ټولنو په جوړولو کې یې کلیدي رول درلود. د دغه بنسټ اعلان شوې موخه «د نقاشۍ، لرغون پوهنې او مجسمې جوړونې په برخو کې لا زیات کمال ته درسېدو په موخه د دغو هنرونو د رامنځته کېدو، ودې او اوسني وضعیت اړوند ارزونه» وه. دغه بنسټ منظم جوړښت درلود او د بنجامین ورینچز په دربار او نورو ځایونو کې یې په منظم ډول نندارتونونه جوړل. دغه بنسټ تر ۱۸۲۵ زکال پورې او بیا ځلي له ۱۸۲۸ زکال څخه په ۱۸۳۳ زکال کې د هغو تر منحل کېدو پورې په کلنۍ توګه هنري اثار نندارې ته وړاندې کول.

د نورویچ د هنري مکتب تر ټولو مخکښ هنرمندان کروم او کاټمن و. له دې سره چې د ۱۸۳۰ مې لسیزې پر مهال د دغه مکتب د هنرمندانو له نقاشیو سره لیوالتیا را کمه شوه، خو د دغه مکتب له نقاشیو سره لېوالتیا د سلطنتي اکاډمۍ د ۱۸۷۸ زکال له ژمني نندارتون وروسته په پراخه کچه زیاته شوه. له دې سره د پېړۍ په پای کې د دغه مکتب اړوند ډېری اثار تېرې دورې ته اړوند بلل کېدل.

لومړنی ژوند

جیمز سیلېت په نورویچ کې وزېږید او د ۱۷۶۴ زکال د می په ۱۶ مه د اوک په سنټ مارټین کلیسا کې ورته د تعمید غسل ورکړل. د سیلېت تخلص چې له سوفولک څخه یې سرچینه اخیستې د پخواني انګلیسي منځني نوم sǣliġ  له Sil اختصار څخه اخیستل شوی چې د نیک بخته سړي په معنی دی. 

جیمز د جیمز سیلېټ زوی و چې په ۱۷۳۳ زکال کې د آی، سوفولک کوچني ښار ته په څېرمه کلي کې وزېږېد؛ د هغه مېرمن ماري ډوبسون په ډېر احتمال سره د نورفولک په سویل کې دسنټ ماري پلهام کلي څخه وه. جیمز او ماري د د ۱۷۵۹ زکال د جنوري په ۱۶ مه د نورویچ په سنت اګوستین کلیسا کې واده وکړ. هغوی د جمیز (ز. ۱۷۶۰ کال)، جان (ز. ۱۷۶۶ زکال) او رابرټ (ز. ۱۷۶۹ زکال) په نومونو درې نور زامن هم لرل.

د نورویچ د هنري مکتب اړوند هنرمندانو بیوګرافي لیکونکي د هغه د زده کړو او ماشومتوب اړوند پرته له دې چې د نورویچ په ګرامر ښوونځي کې د هغه په زده کړه کولو پوهېږي؛ د نور څه اړوند یې مالومات نه لري. له زده کړو بشپړولو وروسته جیمز د یو نښان جوړونکي هنرمند د شاګرد په توګه کار وکړ او په دې سره د هغه هنري چارې د هغه د هم مهاله هنرمندانو کروم او جان نینهم سره په مشابه توګه پیل شوې. له شاګردۍ څخه له خلاصون وروسته هغه لندن ته ولاړ او په پولي ګرافیک ټولنه کې یې د کاپي لیکونکي په توګه دنده ومونده؛ دغه ټولنه په ۱۷۸۴ زکال کې د جوزف بوث له خوا تاسیس شوې وه او هر کال به یې د کاپي شوو نقاشیو نندارتونه جوړول. په ۱۷۹۳ زکال کې د دغې بنسټ له سوزېدو وروسته سیلېټ اړ شو ځانته بل چېرې دنده پیدا کړي.

سیلېټ په نورویچ مرکیوري کې ادعا وکړه چې له ۱۷۸۷ زکال څخه یې تر ۱۷۹۰ زکال پورې د سلطنتي اکاډمۍ په ښوونځیو کې زده کړې کړې دي، خو داسې هېڅ شواهد شتون نه لري چې دغه ادعا دې ثابته کړي ځکه په دغه اکاډمۍ کې د زده کوونکو د شمولیت اړوند په خپرو شوو لیستونو کې د هغه نوم نه دی راغلی.

کورنۍ

سیلېت په ۱۸۰۱ زکال کې د ختیځ درهام له اوسېدونکې آن بنیارډ سره واده وکړ او د هغې له لارې د یوې اندازې شتمنۍ څښتن شو.

د دوی له پنځو ماشومانو څخه یې درې یې په ماشومتوب کې مړه شول. د دوی لور ایما د ګلانو د نقاشې په توګه شهرت وموند، خو له دې سربېره یې د حیواناتو، میوو او صدفونو نقاشي کوله. ایما سیلېټ او د هغې پلار یوازني هنرمندان و چې د ایمیلي سټنارډ په دوره کې یې له هغې سره سیالي کولای شوه. د هغې هنري وړتیا لامل وګرځېده څو له ۱۸۱۷ زکال وروسته له خپل پلار سره د تدریس په برخه کې مرسته وکړي، خو د هغې د ژوند یا هنري چارو اړوند ډېر لږ اطلاعات شتون لري. د هغې ورور جیمز بنیارډ سیلېټ (ز. ۱۸۰۹ زکال) د خپل پلار مسلک غوره نه کړ، خو د ژبو ښوونکی شو. ایما او جیمز بنیارډ په نورفولک کې یوځای ژوند کاوه؛ ایما د ۱۸۸۰ زکال د جنوري په ۲۷ مه د ۲۷ کلونو په عمر په داسې حال کې چې واده یې نه و کړی مړه شوه، همدارنګه د هغې ورور هم د ۹۰ کلونو په عمر بې واده کولو ومړ.