ترزا مې

ترزا مې

Theresa May (انګليسي)

اړوند

زېږونځای	Eastbourne (en)
ښاروندتوب	برېتانيا
زېږون نېټه	۱ اکتوبر ۱۹۵۶
استوګنځی	Sonning (en) — Oxfordshire (en) — 10 Downing Street (en)
زدکړنځی	Wheatley Park School (en) — St Hugh's College (en)
ژبې	انګرېزي ژبه
ګوند	Conservative Party (en)
دنده	سياستوال

ټوليز مالومات

عمومي مالومات	انسان
دین	Anglicanism (en)

اړين مالومات

مهمې پېښې	۳۰ جون ۲۰۱۰ : apology to the House of Commons (en)

کچه او لوړوالی

لوړوالی	۱۷۲٫۷۲ سنتيمتر

جوړښت

جایزې	Time 100 (en) (۲۰۱۷)  Order of King Abdulaziz al Saud (en)

نور مالومات

وېب‌پاڼه	tmay.co.uk (انګرېزي ژبه)

تېریزاماري، مېرمن مې (د زېږد نوم: برېزیر، چې د ۱۹۵۶ زکال د اکتوبر په لومړۍ نېټه زیږېدلې ده) یوه بریتانوی سیاستواله ده چې له ۲۰۱۶ ز نه تر ۲۰۱۹ ز پورې یې د بریتانیا د لومړۍ وزېرې او د محافظه کار ګوند د مشرې په توګه دنده ترسره کړې ده. له ۲۰۱۰ ز کال نه تر ۲۰۱۶ز پورې د کامرون په حکومت کې د کورنیو چارو د وزیرې په توګه او له ۱۹۹۷ ز کال راهیسې په بېرکشایر کې د مېډين هېد په استازیتوب د پارلمان غړې وه. نوموړې له ایډیالوژیکي اړخه ځان د یوه ملته محافظه کارې په توګه ګني.

مېرمن می په اکسفوردشایر کې لویه شوې ده او د اکسفورد سېنټ هوګ په کالج کې یې زده کړې کړې دي. په ۱۹۹۷ ز کال کې له فراغت نه وروسته، نوموړې د انګلستان بانک او د تادیاتو د تصفیې د چوپړتیاوو په ټولنه کې کار وکړ. هغې په میرټن کې د ډرنفورډ په استازیتوب د شورا د غړې په توګه هم دنده ترسره کړه. د ولسي جرګې د غړیتوب لپاره له دوو ناکامو هڅو وروسته، په ۱۹۹۷ ز کال کې نوموړې د میدن هیډ د استازې په توګه پارلمان ته لاره پیدا کړه. آغلې مې، د رسمي اپوزېسیون په سیوري کابینه کې له ۱۹۹۹ نه تر تر ۲۰۱۰ ز کال پورې بېلابېلې دندې ترسره کړې دي. له ۲۰۰۲ نه تر ۲۰۰۳ ز کال پورې نوموړې د محافظه کار ګوند مشره هم وه. د ۲۰۱۰ ز کال له عمومي ټاکنو وروسته د ګډ حکومت په جوړېدو سره، آغلې مې د کورنیو چارو وزیره او د ښځو او مساواتو وزیره وټاکل شوه، خو له وروستۍ دندې نه یې په ۲۰۱۲ ز کال کې استعفا ورکړه. د ۲۰۱۵ ز کال په عمومي ټاکنو کې بیا د کورنیو چارو د وزیرې په توګه وټاکل شوه، چې په ۶۰ کلونو کې د کورنیو چارو په وزارت کې یې تر ټولو اوږده دنده ترسره کړې ده. هغې د خپلې دورې په موده کې د پولیسو په لیکو کې اصلاحات په لاره واچول، د نشه یي توکو د پالیسۍ او د قات د بوټي د بندیز په اړه یې سختې کرښې و ټاکلې او په کډوالۍ یې نور محدودیتونه راوستل.  نوموړې د ټاکل شویو پولیسو او جرمونو د کمېشنرانو معرفي، د ابو قتاده له شړلو څارنه کوله او د پولیسو کالج او د جرمونو ملي اداره یې منځ ته راوړه.  

د ۲۰۱۶ ز کال د جولای په میاشت کې د ډیویډ کامرون له استعفا نه وروسته، آغلې مې د محافظه کار ګوند مشره وټاکل شوه او له مارګریت تاچر وروسته دویمه ښځه ده چې د بریتانیا د لومړۍ وزیرې په توګه یې دنده ترسره کړه. نوموړې لومړۍ او تر اوسه یوازینۍ ښځه ده چې د دولت د دوو لویو ادارو، د لومړي وزیر دفتر او د کرونیو چارو وزارت مشري یې کړې ده. هغې د ۲۰۱۷ ز کال په مارچ میاشت کې د ۵۰ مادې پر بنسټ له اروپايي اتحادیې نه د انګلستان د وتلو بهیر پیل کړ. په راتلونکې میاشت کې، هغې د بریګزیټ په خبرو اترو کې د خپل ملاتړ د پیاوړي کولو د خپلې ځواکمنې او باثباته رهبرۍ د ښودلو په موخه له نېټې نه مخکې عمومي پارلماني ټاکنې اعلان کړې. د دې ټاکنو په پایله کې یو ځوړند پارلمان (چې هېځ ډلې مطلق اکثریت نه درلود) رامنځ ته شو، چې په کې د محافظه کار ګوند د چوکیو شمېر له ۳۳۰ نه ۳۱۷ چوکیو ته را ټیټ شو، که څه هم نوموړي ګوند، له ۱۹۸۳ ز کال نه را په دې خو ترټولو لوړې رایې وګټلې.

نوموړې د لومړي وزیر په توګه، د چیکرز د تړون پر بنسټ له اروپایي اتحادیې نه د بریتانیا د وتلو یا برېګزېټ خبرې پر مخ بوتلې، چې په پایله کې د برېګزېټ هوکړه وشوه. هغې د ملي روغتیا د چوپړتیاوو د اوږدمهاله پلان پر مټ د ملي روغتیا د چوپړتیاوو د تمویل لپاره د ۲۰ ملیارده پونډو د زیاتوالي څارنه هم کوله، د لومړي ځل لپاره یې د نژداي توپیر د څارنې پلاوي را منځ ته کړ او د چاپېریال ۲۵ کلن پلان یې په لاره واچو. د ۲۰۰۸ ز کال د اقلیم د بدلون قانون یې تعدیل کړ چې پر بنسټ یې د بریتانیا ونډه، په ۲۰۲۵ ز کال کې د نړیوالې تودوخې په برخه کې پای ته رسېږي. په انګلستان کې د بېکارۍ شمېر ټيتې کچې ته ورسېد، چې له ۱۹۷۵ ز کال نه را په دې خوا د بېکارۍ ترټولو ټیټ ریکارډ دی. وروسته له هغه چې د نوموړې د برېګزېټ د وتلو د تړون مسوده د پارلمان له خوا درې ځلې رد شوه، هغې استعفا ورکړه او د هغې د بهرنیو چارو پخوانی وزیر بوریس جانسن یې ځایناستی شو. هغه په ولسي جرګه کې د غړې په توګه پاتې کېږي.

د ژوند لومړي کلونه، کورنۍ او زده کړې

تېرېزا مې، د ۱۹۵۶ ز کال په اکتوبر میاشت کې په ایسټبورن، سوسیکس کې نړۍ ته سترګې پرانستې او د زیدي ماري (د زېزد نوم: بارنس، ۱۹۲۸ – ۱۹۸۲ز) او هوبرټ برېزیر (۱۹۱۷ – ۱۹۸۱ز) یوازینی ماشوم و. د هغې پلار د انګلستان د کلیسا مشر او (انګلیسي کاتولیک) مذهبه و چې د ایستبورن د روغتون کشیش و. هغه وروسته د هایتروپ او اینسټون او په پای کې د اکسفورډ په ختیځ کې په ویتلې کې د سینټ ماري کشیش شو. مې مور، د محافظه کار ګوند ملاتړې وه. پلار یې په ۱۹۸۱ ز کال کې د موټر د ترافیکي پېښې د ټپونو له امله له دې نړۍ سترګې پتې کړې او مور یې په راتلونکي کال کې د عصبي سیستم د ناروغۍ له امله له نړۍ سره مخه ښه وکړه. مې وروسته وویل چې: " خواشینې ده چې دوی [د هغې مور او پلار] هېڅکله و نه لیدلم، چې زه د پارلمان د غړي په توګه ټاکل شوې یم."

می، په پیل کې د هیتروپ په لومړي ښوونځي کې چې یو دولتي ښوونځی و، زده کړې پیل کړې، وروسته یې د سینټ جولیانا کانونټ د نجونو په ښوونځي کې چې په بیګبروک کې د رومي کاتولیک خپلواک ښوونځی و او په ۱۹۸۴ ز کال کې وتړل شوه، خپلو زده کړو ته دوام ورکړ.

نوموړې په ۱۳ کلنۍ کې د هولټن پارک د نجونو د ګرامر په پخواني ښوونځي کې، چې په ویټلي کې دولتي ښوونځی و، ځای وګاټه. د هغې د زده کړې په دوره کې د اکسفوردشایر ښوونیز سیستم له سره تنظیم شو او ښوونځۍ د ویلتي پارک عالي ښوونځۍ ته بدله شوه. آغلې مې د اکسفورډ په پوهنتون کې ګډون وکړ او په سینټ هیګ کالج کې یې د جغرافیې برخه ولوستله او په ۱۹۷۷ ز کال کې د لېسانس دویمه درجه سند ترلاسه کړ. هغې د شنبې په ورځو د خپل خرڅ د ګټلو لپاره په نانوایي کې کار کاوه او جګه، فیشن ته پام لرونکې ځوانه ښځه وه. د نوموړې د ملګرو په وینا: "هغې له ماشومتوب راهیسې د لومړۍ ښځینه لومړۍ وزیرې ځای ته د رسېدو د هیلو په اړه خبرې کولې." د پوهنتون د یوه ملګرې یې، پټ فرانکلنډ وایي: "زما داسې وخت نه په یادېږي چې هغې به د سیاسي هیلو په اړه خبرې نه کولې. زما هغه وخت ښه په یاد دی، کله مارګریت تاچر لومړی دا مقام خپل کړ، هغه ډېره په غوصه شوې وه." 

پخوانۍ تجربه

آغلې مې د ۱۹۷۷ او ۱۹۸۳ ز کلونو ترمنځ، د انګلستان په بانک کې او له ۱۹۸۵ ز نه تر ۱۹۹۷ ز کال پورې یې، د تادیاتو د تصفیې د چوپړتیاوو دفتر کې د مالي سلاکارې په توګه دنده ترسره کړه. نوموړې په دې بنسټ کې له ۱۹۸۹ نه تر ۱۹۹۶ ز کال پورې د اروپا د چارو د څانګې د رئیسې او له ۱۹۹۶ ز کال نه تر ۱۹۹۷ ز کال پورې د نړیوالو چارو د سترې سلاکارې په توګه دنده ترسره کړه.

د سیاست په ډګر کې لومړي ګامونه

آغلې می، له ۱۹۸۶ کال نه تر ۱۹۹۴ ز کال پورې د لندن د میرتون په ټولنه کې د ټولنې په شورا کې د ډرنسفورډ وارډ په استازيتوت د شورا د غړې په توګه دنده ترسره کړه، چې په دې ځای کې (۱۹۸۸ – ۱۹۹۰ز) د ښوونې او روزنې رئیسه وه او (۱۹۹۲ – ۱۹۹۴ز) کې د ډلې مرستیاله او د شورا ویانده وه. 

نابریالۍ ملي هڅې

مېرمن می، د ۱۹۹۲ ز کال په عمومي ټاکنو کې د شمال لوېدیځ درهم د کارګر ګوند د خوندي چوکۍ لپاره د محافظه کار ګوند نومانده وه، د اوسني غړې هیلري آرمسټرانګ نه وروسته په دویم ځای کې راغله او د لیبرال دیموکرات راتلونکي مشر ټیم فارون درېیم ځای خپل کړ. آغلې می بیا د ۱۹۹۴ز په ناڅاپي ضمني ټاکنو کې، چې د پارلمان د کارګر غړي جو ریچارډسن د مړینه له امله وو، ډګر ته راغله. دا چوکۍ په ۱۹۴۵ ز کال کې له را منځ ته کېدو راهیسې په پرله پسې توګه د کارګر ګوند په واک کې وه او داسې انګېرل کېده چې د کارګر ګوند نومانده مارګریټ هوج به یې په اسانۍ سره وګټي، چې همداسې هم وشول. په دې سیالۍ کې، آغلې می یو لرې درېیم ځای خپل کړ.

پارلماني چوکۍ ته بریالیتوب

آغلې مې د ۱۹۹۷ ز کال له عمومي ټاکنو نه نږدې ۱۸ میاشتې وړاندې، د میډین هیډ لپاره چې د ویندسور او میډین هیډ او ووکینګام له سهم نه یوه نوې خوندي تازه منځ ته راغلې څوکۍ وه، د محافظه کار ګوند د نوماندې په توګه وټاکل شوه. نوموړې د ۲۵۳۴۴ (۴۹.۸٪)  رایو په ګټلو سره چې د دویم کس، د لیبرال دیموکراتانو د نوماند اندریو ترینس کیترینګهم چې ۱۳۳۶۳ (۲۶.۳٪) رایې یې وړې وې، د ټولو رایو په پرتله یې دوه برابره وې، په اسانۍ سره وټاکل شوه. له دې سره، د نوموړې ګوند په ۱۵۰ وروستیو کلونو کې تر ټولو بدې ماتې سره مخامخ شوه.