د ملکې ویکټوریا د تاج اېښودو مراسم
د متحدې پاچاهۍ د ملکې په توګه د ویکټوریا د تاج اېښودو مراسم د ۱۸۳۸ زکال د جون میاشتې په ۲۸مه نېټه څه کم یو کال وروسته له هغه ترسره شول چې نوموړې د ۱۸ کلنۍ په عمر د متحدې پاچاهۍ سلطنت خپل کړ. دغه مراسم د باکېنګهام ماڼۍ په کوڅو کې د عامو وګړو له راغونډېدو وروسته ترسره شول چې بیا له مراسمو وروسته خپله ملکه هم د دوی منځ ته ورغله.
د تاج اېښودو د مراسمو لپاره چمتووالي د ۱۸۳۸ زکال په مارچ میاشت کې د لومړي وزیر لارډ ملبورن تر مشرۍ لاندې د کابینې په کچه پیل شول. د بېلابېلو ګوندونو د مخالفتونو سربېره کابینې د اپرېل د میاشتې په اوومې نېټې د شنبې په ورځ اعلان وکړ چې د تاج اېښودو مراسم به په جون میاشت کې د پارلماني دورې په وروستیو کې ترسره کړي. د دغو مراسمو لپاره ۷۰ زره پونډه بودیجه تخصیص شوه چې د ۱۸۳۱ زکال د تاج اېښودو د مراسمو د «کم کړای شوي لګښت» دوه چنده وه، خو د ۱۸۲۱ زکال په جولای میاشت کې د پاچا څلورم جورج د تاج اېښودو د مراسمو له ۲۴۰ زره پونډه لګښت څخه ډیره لږ وه. د دغو مراسمو یو کلیدي عنصر هم عامو وګړو ته د هغو وړاندې کول وو.
په ۱۸۳۸ زکال کې د نوې جوړې شوې اوسپنۍ پټلۍ پر مټ ګڼ شمېر کسانو وکولای شول ځانونه تر لندنه را ورسوي؛ اټکل شوی چې د دغو مراسمو په دواړو جشنونو کې شاوخوا ۴۰۰ زرو ګډون کوونکو ونډه لرله چې سړکونه او نږدې پارکونه یې په بشپړ ډول ډک کړي و او همدارنګه یې نندارې ترسره کولې. هایډ پارک د لویو نندارو مرکز و او یو له دغو نندارو څخه په پراشوټ کې راښکته کېدل و. په پیل کې پلان دا و چې دغه جشنونه به یوازې دوې ورځې دوام وکړي، خو د خلکو په غوښتنه یې څلور ورځې دوام وموند. په ګرین پارک کې د مراسمو له شپې وروسته اورلوبې ترسره شوې. د تاج اېښودو مراسم په داسې مهال کې ترسره شول چې هوا په بشپړه توګه ښه وه او ټول دغه مراسم د مطبوعاتو او خلکو له خوا بریالي وبلل شول؛ بل پلو ویسټ مېنسټر بیا د ګډوډۍ له یوه ناخوښه کوونکي اتفاق سره مخ و چې تر ډېره پورې د تمرین لپاره د وخت د کمښت له امله و. ورته مهال په ټول هېواد په ځانګړې توګه د انګلستان په شمال کې بیا د راډیکالانو له خوا د تاج اېښودو له مراسمو سره مخالفتونو شتون درلود.
مخینه او پلان جوړونه[سمول]
ملکه ویکټوریا د ۱۸۳۷ زکال د جون په ۲۰مه د خپل پاچا تره، څلورم ویلیام ځای ناستې شوه. د هغې لومړنی لومړی وزیر لارډ ملبورن و چې ورسره یې د ملګرتیا نږدې اړیکې لرلې. په ۱۸۳۷ زکال کې د پاچا د مړینې له امله پارلمان په اتوماتیک ډول منحل شو؛ همدا و چې د نوي پارلمان لپاره عمومي ټاکنې د همدغه کال د جولای میاشتې له ۲۴مې نېټې څخه د اګست تر ۱۸مې نېټې پورې ترسره شوې؛ په ټاکنو کې ملبورن بریالی شو او د هغه وېګ ګوند د نورو څلورو کلونو لپاره بېرته واک خپل کړ. خو د مخالف محافظه ګار ګوند (پخواني ټروی ګوند) پر وړاندې د هغوی اکثریت له ۱۱۲ اضافي څوکیو څخه ۳۰ ته راکم شو. ملبورن د ویکټوریا د تاج اېښودو د مراسمو د پلان جوړونې، چمتووالي او اجرا اصلي لوبغاړی و. [۱][۲][۳]
د ملبورن کابینې د ۱۸۳۸ زکال په مارچ میاشت کې د تاج اېښودو د مراسمو اړوند رسمي بحثونه پیل کړل. د دغو مراسمو په ترسره کولو کې یو اصلي عامل دا هم و چې دغه د تاج اېښودو مراسم د ۱۸۳۲ زکال د اصلاحاتو له قانون وروسته چې له مخې یې حکومت په سلطنت کې بنسټیز اصلاحات رامنځته کړل، د اصلاحاتو پر بنسټ لومړني مراسم وو. د مراسمو په اصطلاح کې د امتیازاتو تمدید په دې معنی و چې د سلطنتي سیالانو سربېره د مقننه شورا ۵۰۰ استازي هم دغه مراسمو ته وربلل کېدل. ورته مهال زیات پام د عامو وګړو بلنې ته و؛ له همدې امله ملبورن د لندن په واټونو کې د عامه وګړو د راغونډېدو له څو سوه کلن دود څخه دفاع وکړه. [۴][۵][۶][۷][۸][۹]
د لګښت له مخې، دولت په ۱۸۲۱ زکال کې د څلورم جورج د تاج اېښودو د مجللو مراسمو او همدارنګه په ۱۸۳۱ زکال کې د څلورم ویلیام د کم لګښت لرونکو مراسمو ترمنځ چې «نیمه تاج اېښودنه» هم بلل کېده؛ لار ورکی و. پرېکړه دا وشوه چې دغو مراسمو ته ۷۰ زره پونډه بودیجه ځانګړې شي چې د دوه ډوله افراطي لګښتونو یعنې د ۲۴۰ زره پونډه (۱۸۲۱ زکال) او ۳۰ زره پونډه (۱۸۳۱ زکال) ترمنځ یو سازښت ډوله لګښت وي. [۱۰][۱۱]
اعتراضات[سمول]
د تاج اېښودو د مراسمو لپاره د دولت پروګرامونو د ګڼ شمېر مخالفینو نیوکې را وپارولې. دغه نیوکې بېلابېلو لاملونو ته اړوند وې؛ محافظه کارانو او راډیکالانو دواړو ټینګار درلود چې د تاج اېښودو مراسم باید د یو وګړیز جشن په توګه ولمانځل شي او د امکان تر کچې د عامه وګړو د لید وړ وي. د محافظه کارانو مخالفت چې له وړاندې مطرح شوی و په دې بنسټ و چې د عامو وګړو د اوږد مهاله راغونډېدو په برخه کې دولتي پروګرامونه یوازې د لګښت د زیاتوالي په موخه دي او په وېسټ مېنسټر کې د سنتي مراسمو دبدبه راکموي. بل پلو د چارټېسټي (منشور پالونکي) خوځښت په ګډون کیڼ اړخي راډیکالان چې تر ډېره د سلطنت پر ضد وو، دغه ډول مراسم یې ډېر لګښتمن ګڼل. [۱۲][۱۳][۱۴]
ماڼۍ ته بېرته تګ[سمول]
ملکې د خپلو خاطراتو د کتابچې د ۲۸مې نېټې په پاڼه کې ولیکل چې هغه د مازیګر په ۴:۱۵ بجو باکېنګهام ماڼۍ ته د دولتي پلاوي سره یوځای له مراسمو څخه بېرته راوګرځېده. هغې دغې ماڼۍ ته په بېرته تګ کې د عامو وګړو بیروبار توضېح کړی و. هغه له شپږو بجو لږ وروسته خپل کور ته ورسېده او په اتو بجو یې د شپې ډوډۍ وخوړه. د شپې له ډوډۍ خوړولو وروسته یې د باکېنګهام ماڼۍ له بالکن څخه په ګرین پارک کې د اور لوبو ننداره کوله. ویکټوریا لیکلي چې د سبا تر ۱۱:۳۰ بجو پورې یې ډوډۍ ته زړه نه کېده او له غرمې وروسته یې په هایډ پارک کې د جشنونو څخه لیدنه وکړه او هلته یې شته بیروبار د بلې هر ډول تفرېح څخه زیات توصیف کړ. [۱۵][۱۶][۱۷][۱۸]
د ویکټوریا د تاج اېښودو مراسم چې د ۱۸۳۱ زکال د سپټمبر په ۸مه نېټه د هغه د تره څلورم ویلیام د تاج اېښودو له مراسمو وروسته ترسره شول په ۱۹مه پېړۍ کې د بریتانیا د تاج اېښودو د دریو مراسمو وروستی مورد و. ویکټوریا د ۱۹۰۱ زکال د جنوري میاشتې په ۲۲مه نېټه د ۸۱ کلونو په عمر د مړینې پر مهال د بریتانیا هغه واکمنه وه چې د ټولو نورو بریتانوي واکمنانونو څخه یې د ډېر مهال لپاره د سلطنت څوکۍ په واک کې لرله، خو دغه ریکارډ د ۲۰۱۵ زکال په سپټمبر میاشت کې د ملکې دویمې الیزابت له خوا مات شو. د هغې زوی او ځای ناستي اووم اډوارډ بیا د ۱۹۰۲ زکال د اګست په ۹مه د پاچاهۍ تاج پر سر کېښود.
سلطنتي مېلمانه[سمول]
د لندن د مجلې د راپور له مخې په دغو مراسمو کې یادو سلطنتي مېلمنو ونډه لرله: [۱۹]
- د کېنټ او ستراتهیرن دوشس، د ملکې ویکټوریا مور
- د لینینګن شهزاده، د ملکې میرنی ورور
- د هوهنلوهي – لانګنبورګ شاهزادګۍ، د ملکې میرنۍ خور[۲۰]
- د ساسکس دوک، د ملکې تره
- د کمبرېج دوک او دوشس، د ملکې تره او خاله
- د کمبرېج شهزاده جورج، د ملکې مشر د تره زوی
- د کمبرېج شهزادګۍ اګوستا، د ملکې مشره د تره لور
- شهزادګۍ اګوستا سوفیا، د ملکې عمه
- د ګلوسسټر او اډینبورګ شاهزداګۍ، د ملکې عمه
- د ساکس – کوبرګ او ګوتا دوک، د ملکې ماما
- د مونسټر ارل، د ملکې د ماما مشر زوی
- د شلزویګ – هولشټاین – سانډربرګ – ګلوکزبرګ شاهزاده کریسټین، د ملکې د دریم تره زوی (د ملکې د تره او د ډنمارک د پاچا په استازولۍ)
- د ناساوو دوک، د ملکې د تره زوی
- د نیماروس دوک (د خپل پلار یعنې د فرانسې د پاچا په استازولۍ)
- د هسي – پیلپستال – براچفیلډ شهزاده، ارنست فریدریک (د خپل ورور یعنې د هسي، پیلپستال – براچفیلډ د لنډګرېو په استازولۍ)
- د لیجین شهزاده (د بلجیم د پاچا په استازولۍ)
نور مېلمانه[سمول]
- کنټ ګریګوري الکساندروېچ سټراګانوف (د روسې د تزار په استازولۍ)
- احمد فتحي پاشا
- ابراهیم صارم پاشا (د عثماني سلطان په استازولۍ).
سرچينې[سمول]
- ↑ Worsley 2018, p. 81.
- ↑ Worsley 2018, pp. 86–87.
- ↑ Strong, Roy. "Queen Victoria's Coronation". Queen Victoria's Journals. Royal Archives. د لاسرسينېټه ۰۸ اپرېل ۲۰۱۹. الوسيط
|CitationClass=تم تجاهله (مساعدة)کينډۍ:Subscription required - ↑ Worsley 2018, p. 94.
- ↑ Strong, Roy. "Queen Victoria's Coronation". Queen Victoria's Journals. Royal Archives. د لاسرسينېټه ۰۸ اپرېل ۲۰۱۹. الوسيط
|CitationClass=تم تجاهله (مساعدة)کينډۍ:Subscription required - ↑ Worsley 2018, pp. 94–95.
- ↑ Worsley 2018, p. 95.
- ↑ Worsley 2018, p. 96.
- ↑ Worsley 2018, p. 95.
- ↑ Worsley 2018, p. 94.
- ↑ Strong, Roy. "Queen Victoria's Coronation". Queen Victoria's Journals. Royal Archives. د لاسرسينېټه ۰۸ اپرېل ۲۰۱۹. الوسيط
|CitationClass=تم تجاهله (مساعدة)کينډۍ:Subscription required - ↑ Plunkett 2003, p. 22.
- ↑ Plunkett 2003, pp. 26–27.
- ↑ Plunkett 2003, pp. 18–21 (ballad, p. 21).
- ↑ "Princess Beatrice's copies". Queen Victoria's Journals. Royal Archives. 28 June 1838. د کتاب پاڼې 82. د لاسرسينېټه ۲۴ مې ۲۰۱۳. الوسيط
|CitationClass=تم تجاهله (مساعدة)کينډۍ:Subscription required - ↑ "Princess Beatrice's copies". Queen Victoria's Journals. Royal Archives. 28 June 1838. د کتاب پاڼې 85. د لاسرسينېټه ۱۱ اپرېل ۲۰۱۹. الوسيط
|CitationClass=تم تجاهله (مساعدة)کينډۍ:Subscription required - ↑ Worsley 2018, p. 103.
- ↑ "Princess Beatrice's copies". Queen Victoria's Journals. Royal Archives. 29 June 1838. د کتاب پاڼې 85. د لاسرسينېټه ۱۱ اپرېل ۲۰۱۹. الوسيط
|CitationClass=تم تجاهله (مساعدة)کينډۍ:Subscription required - ↑ کينډۍ:London Gazette
- ↑ "Key to Mr Leslie's picture of Queen Victoria receiving the Holy Sacrament at her Coronation". National Portrait Gallery. الوسيط
|CitationClass=تم تجاهله (مساعدة)