مانسېرې ډبرليک

د مانسېرې ډبرليکونه يا ډبرين فرمانونه د موريا سترواکۍ د اشوکا څوارلس فرمانونه دي چې د خيبر پښتونخوا په مانسېره ولسوالۍ کې په ډبرو ليکل شوي دي. دا فرمانونه په درې بېلابېلو ډبرو کښل شوي دي چې درېمې مخزېږديزې پېړۍ پورې اړه لري او د گندهارا کلتور په لرغوني هندي ليکدود(خروشتي) ليکل شوي دي چې د اشوکا د مذهب اړخونه پکې ذکر شوي دي.

دا ځای د یونېسکو نړیوال میراثځايونو لپاره نوماند لرغونځی دی.

مانسېرې ډبرليک

ټوليز مالومات

عمومي مالومات	د لرغون پېژندنې ځای
اداري سیمه	مانسهره ولسوالۍ
هېواد	پاکستان

تاريخي اثار

د یونيسکو نړیوال میراث
د ميراث ډول	نړيوال نوماند ميراثځی
د ميراثېدو کال	۲۰۰۴
میراثونه	(ii) (en) — (iii) (en) — (vi) (en)
د پېژندنې شمیره	[۱]

نور مالومات

وېب‌پاڼه	whc.unesco.org…
کورډي‌نېشن	۳۴°۲۰′۰۰″شمال ۷۳°۱۰′۰۰″ختیځ

موقعيت

دا ډبرليکونه د خيبرپښتونخوا ايالت د مانسېرې ښار نه بېرون د يوې کوچنۍ ډبرينې غونډۍ په يوه څنډه کې ليکل شوي دي، دا ځای د لرغونې ورېښمو لارې په اوږدو کې د قراقرم لويې لارې ته نږدې موقعيت لري.دا ځای د ټېکسلا لرغوني ښار په سوېل او د اېبټ اباد سيمې ختيځ ته ډېر نږدې پروت دی.

پېښليک

وروسته له هغې چې اشوکا د اړیسه (کلينگا) سيمه ونيوله او د هغې پوځ له خوا د هغې سيمې د ويجاړۍ له کبله خوابدی شو؛ نو بوداييزم يې د خپل دين په توگه ومانه، د خپل مذهب تر بدلولو وروسته اشوکا د موريا سترواکۍ په اوږدو کې د بودايي سپېڅلو ځايونو ليدنه وکړه او ډېرې ستنې يې جوړې کړې چې د هغه د اخلاقو د نوي قانون ليکنې يې درلودې. د مانسېرې ډبرليکونه د اشوکا د هغه ۳۳ فرمانونو څخه يو دي چې د بوداييزم د پراختيا او مذهبي قانون په توگه ليکل شوي وو. ۱۴ فرمانونه په خروشتي ليکدود چې يو لرغونی ليکدود دی او هغه مهال په گندهارا کې کارول کېده، ليکل شوي دي.خروشتي ليکدود د لومړي ځل لپاره د جيمز پرينسېپ له خوا ولوستل شوو، له هغې وروسته د اشوکا فرمانونه د هغې مطابق نورو ژبو ته وژباړل شول.

ساتنه

د هوا او چاپېريال د اغېزو له کبله ډبرې تخرېبېدلې او لوستل يې ورځ تر بلې ناشوني کېدل؛ نو هماغه وو چې د دې ځای د ژغورنې او خونديتوب لپاره پاکستان د لرغونپېژندنې ادارې د ډبرو د پوښلو او د هوا له شرايطو څخه د هغوی د ساتنې لپاره چترۍ چمتو کړې.

د نړيوال ميراثځی په توگه

په ۲۰۰۴ ز کال کې د پاکستان لرغونپوهنې او موزيمونو څانگې له خوا دا ځای يونېسکو ته د نړيوالو ميراثځايونو نوملړ کې شاملولو په موخه د ii، iii، او vi کلتوري سيمې په توگه وړاندې شو.

دا هم وگورئ

• اشوکا
• موريا سترواکي
• خيبر پښتونخوا
• گندهارا
• بوداييزم
• هندوويزم
• ټېکسلا

مانسېرې ډبرليکونو انځورونه

• 
  مانسېرې لومړی ډبرليک (۱-۸ فرمانونه)
• 
  مانسېرې دوهم ډبرليک (۹-۱۱ فرمانونه)
• 
  مانسېرې درېيم ډبرليک (۱۲ فرمان)
• 
  مانسرې څلورم ډبرليک (۱۳-۱۴ فرمانونه)
• 
  د هوا او چاپېريال له اغېزو د خونديتوب په موخه د مانسېرې ډبرليک لپاره جوړ شوی چت
• 
  مانسېرې ډبرليک يو نژدې ليد