د نړۍ شتمن وګړي

د نړۍ شتمن وګړي يا د نړۍ بډايه وګړي يا د نړۍ ميلياردران انګليسي ژبه: The World's Billionaires‎ د نړۍ د شتمنو وګړو يو نوملړ دی چې د فوربز مجلې د کلنۍ ارزونې راپور له مخې له ۱۹۸۷ ز راهيسې هر کال د مارچ مياشت کې د نړۍ ميلياردرانو تر سرليک لاندې خپريږي.

په تېرو شلو کلونو کې د مايکروسافټ کمپنۍ مشر بېل ګيټس ۱۵ ځله د دې نوملړ مخکښ وو، چې له ۱۹۹۴ تر ۲۰۰۹ ز کال پورې د نړۍ تر ټولو ډېر شتمن وګړی ګڼل کېده، خو وروسته په ۲۰۱۰ ز کال کې د امريکا موويل شرکت څښتن کارلوس سليم دا مقام خپل کړ او په پرلپسې ډول ۴ کاله د نړۍ ترټولو شتمن وګړی ګڼل کېده، خو په ۲۰۱۴ ز کال کې يو ځل بيا بېل ګيټس دا مقام خپل کړ.

د نړۍ شتمن وګړي

The World's Billionaires (انگليسي)

ټوليز مالومات

عمومي مالومات	درجه بندۍ لړليک کلنی لړليک انساني ډله

نور اړين مالومات

برخې	د شتمنۍ له مخې د هنديانو نوملړ د فوربېز مجلې د کلني راپور له مخې روسي ملياردانو نوملړ د نړۍ ميلياردرانو نوملړ

نور مالومات

وېب‌پاڼه	forbes.com… (انګليسي ژبه)

د ۲۰۱۸ ز کال د مارچ په ۶ مه نېټه بېل ګيټس خپل ځای د امازون شرکت مشر جېف بېزوس ته پرېښود چې تر ۲۰۲۲ ز کال پورې د نړۍ ترټولو شتمن سړي ريکارډ يې له ځانه سره درلود،او بلاخره په ۲۰۲۲ ز کال کې يې دا مقام اېلن ماسک ته پرېښود.

د ۲۰۲۳ ز کال مارچ مياشت کې د نړۍ تر ټولو شتمن سړي مقام برنار ارنو خپل کړ، نوموړی لومړنی فرانسوی دی چې دا مقام يې ترلاسه کړی دی.

کلنۍ درجه بندي

دا چې دا درجه بندي د هرکال په مارچ مياشت کې خپريږي، نو دلته ليکل شوي نومونه او ترتيب هم د هماغه وخت پورې صحت لري، چې په ترتيب سره پکې د نړۍ لس شتمن وګړي، د هغوی د شتمنۍ له مخې ډلبندي شوي دي.

نښې او توضيحات

نښه	توضيح
	پخوانۍ درجه بندۍ کې بدلون نه دی راغلی.
	پخوانۍ درجه بندۍ څخه لوړ شوی دی.
	پخوانۍ درجه بندۍ څخه کښته شوی دی.

په ۲۰۲۴ ز کال کې د نړۍ تر ټولو شتمن وګړي

د فوربس مجلې د ۳۸ م کلني راپور له مخې د نړۍ ميلياردرانو نوملړ کې د ۲۷۸۱ ميلياردرانو ريکارډ موندل شوی چې خالصه شتمني يې ۱۴.۲ تريليونه ډالر د. دا د ۲۰۲۳ ز کال د ۱۴۱ غړو په پرتله ۲ تریلیونه ډالرو زیاتوالی راښيي، چې په دې نوملړ کې يې د خپلې خالصه شتمنۍ پخوانی ريکارډ پرځای ساتلی دی، چې په ۲۰۲۲ کال کې د ۹۰۰ ملیارد ډالرو ریکارډ څخه واووښت. د لېست دوه پر درېيمه برخه غړي د تېر کال په پرتله ډېر شتمن دي، له هغې ډلې مارک زوګربرګ يادولی شو، چې خالصه شتمني یې ۱۱۲.۶ ملیارده ډالر زیاته شوې ده.

شمېره.	نوم	خالص ارزښت (امريکايي ډالر)	عمر	ښاروندتوب	شتمنۍ سرچينه
	برنارد ارنولټ او کورنۍ يې	$233 ميليارده	۷۵	فرانسه	اېل وي اېم اېچ
	ایلان ماسک	$۱۹۵ ميليارده	۵۲	سوېلي افريقا کاناډا د امريکا متحده ايالات	تسلا موټرز، سپېس‌اېکس
	جېف بېزوس	$۱۹۴ ميليارده	۶۰	د امريکا متحده ايالات	امازون
	مارک زاکربرګ	$۱۷۷ ميليارده	۳۹	د امريکا متحده ايالات	مېتا پلټفارمز
	لاري اېليسون	$۱۴۱ ميليارده	۷۹	د امريکا متحده ايالات	اورکل کارپورېشن
	وارن بفېټ	$۱۳۳ ميليارده	۹۳	د امريکا متحده ايالات	بېرکشاير هاتوای
	بیل ګیټ	$۱۲۸ ميليارده	۶۸	د امريکا متحده ايالات	مايکروسافټ
	سټېو بالمېر	$۱۲۱ ميليارده	۶۸	د امريکا متحده ايالات	مايکروسافټ
	موکېش امباني	$۱۱۶ ميليارده	۶۶	هند	رېلانس اېنډسټريز
	لاري پيج	$۱۱۴ ميليارده	۵۱	د امريکا متحده ايالات	ګوګل

په ۲۰۲۳ ز کال کې د نړۍ تر ټولو شتمن وګړي

د فوربېزد نړۍ د میلیاردرانو په ۳۷م کلني لیست کې۲۶۴۰ میلیاردران شامل وو چې ټولټال خالصه شتمني یې ۱۲.۲ تریلیونه ډالر وه، چې د ۲۰۲۲ کال په پرتله ۲۸ غړي او ۵۰۰ ملیارد ډالر کم وو. د لیست له نیمایي څخه ډېر يې د تېر کال په پرتله لږ شتمن شوي، له هغې ډلې اېلان ماسک يادولی شو چې له لومړۍ درجې دوهمې ته راکښته شو. د دې لېست له مخې له ۲۰۱۳ کال راهيسې د لومړي ځل لپاره يو غير امريکايي تبعه فرانسوي کارلوس سليم د نړۍ تر ټولو شتمن شخص وو، په دې ليست کې د ۲۰۲۲ کال په څېر، د ۳۰ کلونو څخه کم عمره ۱۵ میلیاردران شامل وو چې تر ټولو شتمن یې د ریډ بول وارث مارک میټشیټز و چې خالصه شتمني يې ۳۴.۷ ملیارده ډالر و. د دې لیست تر ټولو ځوان کلیمینټ ډیل ویچیو وو، چې د لوکسوټیکا شتمنۍ وارث و چې د خپلو شپږو خویندو او سکنۍ مور سره شریکه وه او کیم جونګ یانګ، چې شتمني یې د جاپاني - سویلي کوریا د لوبو لوی شرکت نیکسون کې ده، دواړه د ۲۰ کلونو څخه کم عمره وو.

شمېره.	نوم	خالص ارزښت (امريکايي ډالر)	عمر	ښاروندتوب	شتمنۍ سرچينه	توضيح
	برنارد ارنولټ او کورنۍ يې	$۲۱۱ ميليارده	۷۴	فرانسه	اېل وي اېم اېچ	برنارد ارنو او کورنۍ یې چې د لویس ويټان، کریسټیان ډیور او ټیفاني په ګډون د موډ او فیشن څو شرکتونه لري، په ټولیزه توګه د ۲۱۱ميليارده ډالره پانګې په لرلو سره د نړۍ د شتمنو کسانو د نوملړ په سر کې ځای لري. د فوربېزمجلې د رپوټ پر بنسټ، ددغې کورنۍ ډېره ګټه د لویس ويټان د محصولاتو څخه دی. همدا راز په تېرو ۱۲ میاشتو کې د ۵۳ ميليارده ډالره عاید ترلاسه کول،‌ د نړۍ د شمتنو کسانو د نوملړ په سر کې د برنارد ارنو او کورنۍ د نوم په راتلو کې مهمه ونډه لرله.‌
	ایلان ماسک	$180 ميليارده	۵۱	سوېلي افريقا کاناډا د امريکا متحده ايالات	تسلا موټرز، سپېس‌اېکس	د تسلا موټرز، سپېس‌اېکس او اېکس شرکت څښتن، ايلان ماسک چې یو وخت د نړۍ تر ټولو بډایه کس ګڼل کېده، اوس مهال د ۱۸۰ ميليارده ډالره پانګې په لرلو سره د نړۍ دویم شتمن کس دی. د ايلان ماسک د پانګې د کچې را ټېټېدل، د تسلا موټرز د پنځوس سلنې ونډې د رالوېدو له امله دی. د نوموړي پانګه او ګټه تېر کال هغه وخت مخ په ځوړ شو چې هغه په ۴۴ ميليارده ډالره د ټویټر شبکه واخیستله. تر پرله پسې تاوانونو وروسته، ايلان ماسک د ۲۳ ميليارده ډالره په ارزښت د تسلا موټرز شرکت ونډه وپلورله. خو دې سره سره، د سپېس‌اېکس شرکت ښه پرمختګ درلود او د تېر کال په می میاشت کې یې ارزښت، ۱۲۷ ميليارده ډ‌الره اټکل شوی و.‌ د روان کال په سر کې یې ارزښت ۱۴۰ ميليارده ډالر اټکل شوی دی. د تېر کال په پرتله بیا د اايلان ماسک پانګه ۳۹ ميليارده ډالره را ټېټه شوې ده.‌
	جېف بېزوس	$114 ميليارده	۵۹	د امريکا متحده ايالات	امازون	د امازون شرکت څښتن،‌ جیف بیزوس چې یو وخت د نړۍ تر ټولو شتمن کس و،‌ د فوربېزمجلې د ترټولو شتمنو کسانو په نوملړ کې بیا دریم ځای لري. د فوربېزمجلې ویلي‌چې د جیف بیزوس ټوله پانګه ۱۱۴ ميليارده ډالره ده.‌ نوموړی د تېر کال په پرتله، ۵۷ ميليارده ډالره لږه پانګه لري‌ چې پدې توګه یې د نړۍ د ترټولو لوی تاواني‌ نوم خپل کړی دی.‌ د امازون شرکت د ۳۸ سلنې ونډې بازار رالوېدل ددغه امریکايي پانګوال د تاوان لوی لامل و.
	لاري اېليسون	$107 ميليارده	۷۸	د امريکا متحده ايالات	اورکل کارپورېشن	د اوراکل شرکت څښتن، لاري اېليسون بیا د فوربېزد شتمنو کسانو په نوملړ کې څلورم ځای ځپل کړی دی. تیر کال ددغه امریکايي پانګه وال، ګټه او پانګه دواړه لس سلنه زیاته شوه. نوموړی اوس مهال ۱۰۷ميليارده ډالره پانګه لري. الیسون تیر کال د امریکا د فلوریډا په ایالت کې د ۱۷۳ میلیونه ډالره په ارزښت یو تر ټولو ګران بیه کور واخیست. نوموړی چې د ټسلا په شرکت کې هم د پام وړ ونډه لري، په تیر اګست میاشتې کې یې د دغه شرکت د مدیره پلاوي څخه استعفا ورکړه.‌
	وارن بفېټ	$106 ميليارده	۹۲	د امريکا متحده ايالات	بېرکشاير هاتوای	وران بفټ چې په نړۍ کې تل د بریالي پانګوال په توګه پیژندل شوی دی،‌ د ۱۰۶ ميليارده ډالره پانګې په لرلو سره د نړۍ پنځم شتمن کس دی.‌ ۹۲ کلن بفټ د برکشایر هټاوي لوی شرکت خاوند دی.‌ د ګایکو بیمې شرکت، د ډوراسل بطرۍ او ډایري کوین رسټورانټونه په ګډون، لسګونه نور لوي او واړه شرکتونه ددغه شرکت تر چتر لاندې دي. نوموړی چې د امریکا د پخواني قانون جوړونکي هاوارډ بفټ زوی دی، په ۱۱ کلنې کې ځانته سوداګریزې ونډې وپیرلې او په ۱۳ کلنې کې دولت ته یې خپل د مالیاتو پاڼۍ وسپارلې. هغه ژمنه کړې چې خپل ۹۹ سلنه پانګه به ډالۍ کوي. بفټ تر اوسه ۵۱ ميليارده ډالره د ګيټس او د خپلو زامنو خیریه بنسټونو ته ډالۍ کړي دي.
	بیل ګیټ	$104 ميليارده	۶۷	د امريکا متحده ايالات	مايکروسافټ	د نړۍ شپږم شتمن کس د مایکروسافت شرکت خاوند، بل ګیټس دی. نوموړي ۱۰۴ ميليارده ډالره پانګه لري. ګيټس یو وخت د نړۍ له مشهورو شتمنو کسانو څخه و.‌ هغه د خپل ګټې ډیرې برخه د خیر ښیګڼې کارونو ته ځانګړې کړې او اوس مهال د ګوزڼ یا پولیو ناروغۍ د ویروس سره د مبارزې پروګرام مالي ملاتړ پر غاړه لري.
	ميکايل بلومبېرګ	$94.5 ميليارده	۸۱	د امريکا متحده ايالات	بلومبېرګ اېل پي	د نیویارک پخوانی ښاروال مایکل بلومبرګ بیا د ۹۴.۵ ميليارده ډالره پانګې په لرلو سره د فوربېزمجلې د شتمنو کسانو د نوملړ په اووم ځای کې قرار لري. نوموړی چې د بلومبرګ ستر شرکت خاوند دی. ددغه شرکت تر چتر لاندې د مالیاتو، سافټ ویرونو او رسنیو یو شمېر شرکتونه کار او فعالیت لري. بلومبرګ تیر کال خیریه بنسټونو ته ۱.۷ ميليارده ډالره بسپنه ورکړه او په همدې وخت کې یې ۱۳.۳ ميليارده ډالره عاید درلودی.‌
	کارلوس سليم او کورنۍ يې	$۹۳ ميليارده	۸۳	مکسيکو	ټېلمېکس، امريکا موويل، کارسو ګروپ	اتم نوم بیا د کارلوس سلیم هیلو په نوم د یوه مکزیکویي میلیارډر دی. نوموړی ۹۳ ميليارده ډالره پانګه لري. سلیم هیلو د پان لاتین ستر مخابراتي شرکت خاوند دی چې په تیر یو کال کی یې عاید ۱۴ سلنه زیاتوالی درلودی.‌ نوموړی چې د پانګونۍ ډیر شوقي و په ۱۲ کلنې کې یې د ونډې په اخیستلو او پیرلو پیل کړی و.‌
	موکېش امباني	$۸۳.۴ ميليارده	۶۵	هند	رېلانس اېنډسټريز	مکیش امباني د ۸۳.۴ ميليارده ډالره پانګې په لرلو سره د فوربېزمجلې د شتمنو کسانو په نوملړ کې نهم ځای خپل کړی دی.‌ امباني د نږدې ۱۰۰ميليارده ډالره په ارزښت د یوه هندي شرکت خاوند دی. هغه په راز راز برخو کې لکه تیلو، انرژۍ او مخابراتو سکټور کې پانګونه کړې ده. همدا راز د یو شمېر شرکتونو چارې یې خپلو زامنو او لورګانو ته سپارلي دي.
	سټېو بالمېر	$۸۰.۷ ميليارده	۶۷	د امريکا متحده ايالات	مايکروسافټ	د فوربېزمجلې د نړۍ د ترټولو شتمنو کسانو په لسم ځای کې د امریکایی پانګه وال سټیف بالمر نوم لیدل کیږي.‌ نوموړی ۸۰.۷ ميليارده ډالره پانګه لري. په زړه پوری خو دا ده چې بالمر په ۱۹۸۰م کال کې د بل ګیټس له خوا د مایکروسافټ په شرکت کې په کار وګمارل شو او په ۲۰۰۰ م کال کې د یاد شرکت د اجراييوی مدیریت څخه د بل ګیټس تر استعفا وروسته، نوموړی پر دغې دنده وګمارل شو او تر ۲۰۱۴م کال پوري یې دغه دنده پر مخ وړله.‌

داهم وګورئ

• د نړۍ ډېر ليدل کېدونکي ښارونه
• د نړۍ جګ وګړي
• د نړۍ ټيټ وګړي

انځورونه

• 
  بېرنارډ ارنولټ په ۲۰۲۴ ز کال کې د نړۍ ترټولو شتمن شخص او د اېل وي اېم اېچ شرکت څښتن.
• 
  ايلان ماسک په ۲۰۲۴ ز کال د نړۍ شتمنو کسانو نوملړ کې دوهم شخص او د ټېسلا موټرز شرکت څښتن.
• 
  جېف بېزوس د نړۍ شتمنو وګړو نوملړ کې دريم شتمن شخص او د امازون شرکت څښتن.
• 
  مارک زوکربرګ په ۲۰۲۴ز کال کې د نړۍ څلورم شتمن شخص او د مېټا فليټ فارم او فيسبوک څښتن.
• 
  لاري اېليسون په ۲۰۲۴ز کال کې د نړۍ پنځم شتمن شخص او د اورکل کارپورېشن څښتن.
• 
  وارن بفېټ په ۲۰۲۴ز کال کې د نړۍ شپږم شتمن شخص او د بېرکشاير هاتوای څښتن.
• 
  بیل ګیټ په ۲۰۲۴ز کال کې د نړۍ اووم شتمن شخص او د د مايکروسافټ شرکت څښتن.
• 
  سټېو بالمېر په ۲۰۲۴ز کال کې د نړۍ اتم شتمن شخص او د مايکروسافټ شرکت برخوال.
• 
  موکېش امباني په ۲۰۲۴ز کال کې د نړۍ نهم شتمن شخص او د رېلانس اېنډسټريز څښتن.
• 
  لاري پيج په ۲۰۲۴ز کال کې د نړۍ لسم شتمن شخص او د ګوګل څښتن.